– Det blir ein del venting, det må ein rekne med. Men vi prøver å legge arbeidet til tider på nettene då det er minst trafikk, seier Sverre Måge, assisterande prosjektleiar i Statens vegvesen.
Statens vegvesen startar no nemleg opp arbeidet med å oppgradere tunnelane på den tungt trafikkerte strekninga gjennom sørlege deler av Sogn og Fjordane og nordlege delar av Hordaland. Arbeidet blir gjort for at tunnelane skal oppfylle nye og strengare EU-krav.
- Les også:
Må vente på leiebil
Ifølgje Vegvesenet skal tunnelane få nye naudstasjonar, brannsikring og betre veglys, rømmingslys og naudlys. I nokre tunnelar må også vass- og frostsikringa utbetrast og det skal installerast nytt elektrisk anlegg og tryggleiksutrustning.
BLIR EIN DEL HEFT: Assisterande prosjektleiar i Statens vegvesen, Sverre Måge, legg ikkje skjul på at bilistar vil oppleve ein del heft på grunn av utbetringsarbeidet i tunnelane.
Foto: Ole Kristian Åset / Statens vegvesen– Det blir ein del heft, vedgår Måge og viser til at arbeidet naturleg nok vil føre til stengingar.
Arbeidet skal utførast på nattetid, og i tidsrommet mellom klokka 22.00 på kvelden og 05.30 om morgonen må folk vere budde på ventetid.
Måge seier dei i størst mogleg grad legg opp til kontinuerleg køyring gjennom tunnelane med leiebil.
– Men det kan også bli stengingar på opp til ein time, seier Måge og legg til at det i nokre tilfelle også kan bli lengre stengingar.
Dette er tunnelane Vegvesenet skal utbetre:
- Mundalsbergtunnelen og Bjørsviktunnelen (Lindås kommune)
- Masfjordtunnelen (Masfjorden kommune)
- Matrebergtunnelen (Masfjorden kommune)
- Trodaltunnelen (Masfjorden kommune)
- Jernfjelltunnelen (Gulen kommune)
- Skrikebergtunnelen (Gulen kommune)
Arbeidet blir ifølgje Måge starta i Mundalsberg- og Bjørsviktunnelen den 18. mai, og så går det fortløpande nordover på E39 og blir avslutta i Gulen innan 2020.
Måge seier vegseksjonen også skal gjere arbeid i fleire av dei andre tunnelane på strekninga og at det også her kan bli stengingar.
Vil koordinere kolonnetider
Tungtransportsjåførar har tidlegare uttrykt misnøye med at tunnelstengingar på same strekning ikkje blir koordinert, og at dei difor får mange stopp på kort tid. Dette håpar Måge at dei skal unngå.
– Vi har hatt møte om dette og kjem til å ha godt samarbeid og kommunikasjon med dei andre tunnelane. Vi skal prøve så godt som vi kan å få best mogleg flyt i trafikken, seier Måge.
Trafikken vil gå som normalt på dagtid i dei tunnelane det blir arbeidd i, men med redusert fartsgrense. Statens vegvesen har oppretta eit system for SMS-varsling, der dei som abonnerer på tenesta vil bli varsla om sprenging eller anna arbeid som fører til lengre stengingar.
