– Særleg i sør og på Svalbard har det vore varmare enn normalt, seier statsmeteorolog Gunnar Livik til NRK.
I Sør-Noreg har varme luftmassar frå kontinentet breidd seg utover saman med høgtrykket som har bygd seg opp over Nord-Europa og Skandinavia.
Varme frå nordaust
Men for Svalbard sin del er forklaringa litt meir overraskande.
– Øygruppa fekk frakta inn milde luftmassar frå nord av alle ting. Det låg eit lågtrykk aust i Barentshavet, rundt den russiske øya Novaja Semlja, og det har vore varmt i Sibir, seier Livik.
Han forklarar det som ei varmluftstunge som har blitt trekt rundt og inn mot Svalbard.
Men framover denne veka vil vêrsituasjonen endre seg, også på øygruppa i nord. Det er venta regn og lågare temperaturar.
- Les også:
Meir ustabilt vêr i vente
Også på Vestlandet går det mot eit vêrskifte frå onsdag av. Frå strålande seinsommardagar vil det gå over til klassisk vestlandsvêr med regnbyer.
– Det utviklar seg vidare at det blir ein fin dag i morgon med høge temperaturar. Det er synd å seie, men det er venta meir og meir ustabilt fram mot helga, seier statsmeteorolog Lars Andreas Selberg.