Det såg fredfullt ut for beitedyra – så skjedde dette

Beitesesongen har vist seg å vere uvanleg rovdyr-roleg for husdyra i store delar av Noreg i år.

Sett bort ifrå fire tilfelle av sau tekne av jerv tidleg i beitesesongen, har det ikkje vore nokon tilfelle av husdyr tekne av dei fire store rovdyra i korkje Vestland, Rogaland, Agder eller Vestfold og Telemark denne beitesesongen.

Heilt til no.

Sist veke vart to sau tekne av gaupe i Vestfold og Telemark.

Måndag vart til saman ti sauar tekne av jerv, funne i Luster i Indre Sogn.

– Beitesesongen har vore fin, der sauane har hatt det godt. Då er det utruleg leit når dette skjer, seier sauebonde og rovdyransvarleg i Vestland Bondelag, Ole Bjarne Hovland.

– Venta at det skulle smelle

Sauebonden Hovland som hadde gleda seg over fin sommar, frykta at dette skulle hende. Det er ikkje uvanleg at jerven tek mest på slutten av beitesesongen, fortel han.

– Me har eigentleg venta på at det skulle smelle. Det har me sett tidlegare år. Når dagane blir kortare kjem jerven på ferde, seier han.

Dette beviser at sauebøndene har hatt grunn til bekymring, ifølge Hovland. Området i Indre Sogn ligg tett opp til forvaltningssona for jerv. At jervebestanden ikkje blir redusert fører til meir streifdyr ned i beiteprioriterte område, meiner han.

– Det var ønska å auke tal på sau øvst i Fortunsdalen og drive på heiltid, men det er ikkje mogleg med så mykje jerv i området, seier han.

Hamstrar til vinteren

Naturoppsynsmann i Statens naturforvaltning, Rein Arne Golf var oppe i dalområda måndag og dokumentere skadane.

– Området ligg tett opp til grensa der det er ønske om reproduserande jerv. Det er opplagt at jerven ikkje ser desse grensene og kjem ned til beiteprioriterte område og gjer skade, seier han.

Det å skadefelle jerv på denne tida av året er så å seie umogleg, ifølge Golf. Det er grunn til å tru at fleire dyr kan bli tekne.

– Jerven har ein tendens til å hamstre til vinteren, og kan finne på å gjere store skadar i desse tider, seier han.

Trass alt ein fin sommar

Fylka er i stor grad beiteprioriterte område. Det er likevel vanleg at streifdyr tar seg inn og fører til store tap.

I fjor var det ulv som forårsaka klyngevis med tap i både Vestland, Rogaland og Agder. Det har ikkje skjedd i år.

Trass tapa i Sogn, er det mogleg at denne sommaren tangerer fredsrekorden.

– Det har vore ein fin sommar, med lite tap særskild i desse fylka, seier seniorrådgivar i Miljødirektoratet Anders Fraa.

Tap av spesielt sau og lam til rovvilt har gått kraftig nedover dei siste åra.

Sidan 2013 er dette talet halvert.

Fraa fortel om stor satsing på førebyggande tiltak for å hindre tap til rovvilt. Det kan vere tidleg sanking og sein beiteslepp, i tillegg til radiobjøller og inngjerding og liknande.

Fraa minner også på at beitesesongen ikkje er over heilt enda. Siste del av beitesesongen vil avgjere kor fredfull denne sesongen vil bli.

– Artar som jerv lagar trøbbel stort sett frå og med denne tida, så vi kan ikkje feire på forskot, seier han.