Timevis med filmsjåing, vurdering og debatt er over. Juryen har plukka ut filmane som skal knive om publikumsprisen.
– Det har vore krevjande. Filmskapinga i fylket har høgt nivå, og det blir stadig høgare. Det er utruleg kjekt å sjå utviklinga i kva det blir laga film om, seier jurysjef Stein Magne Os.
Frå action til kunst
Den tidlegare NRK-produsenten er rådgjevar på Distriktssenteret på Campus i Sogndal. Og det er ikkje første året han sit i juryen til Sogndal filmfestival, som i år går av stabelen 23. og 24. mars.
Bidraga i 2015 viser eit stort spenn i sjangrar, tema, alder og geografi.
Avstemminga er no avslutta. I kveld får du vite kven som vinn Publikumsprisen.
– For nokre år sidan var det veldig mange fiksjonsfilmar. Til dels dramatiske manus med vald, action og skyting. Den type filmar har minka veldig. No er det meir fokus på dokumentariske forteljingar, og reine kunstfilmar, seier Os.
Må ha innhald
– Ungdom tenkjer kanskje lettare fiksjonsforteljing først, og etter kvart som dei kjem inn i filmmediet så får dei lyst til å lage dokumentariske forteljingar og filmar om ting som angår dei, held jurysjefen fram.
– Kva la de vekt på då de plukka ut kandidatane til publikumsprisen?
– Ein god film må fortelje ei gjennomtenkt historie. Den må gje innhald, så sjåaren set att med ei kjensle av at det har vore verdt å sjå filmen og historia.
Nøgd festivalsjef
Festivalsjef Oddvar Vigdal er storveges nøgd med interessa rundt den 10. filmfestivalen. Det er 3. klasse Media ved Sogndal vidaregåande skule som arrangerer festivalen.
– 50 filmar er eit høgt tal og vitnar om kreativitet og stor interesse for produksjon av kortfilm, seier Vigdal.
Jurysjef Os er spent på kven som står att som vinnar 23. mars.
– Juryen har stått fritt til å velje sin heiderspris, så eg er veldig spent på om publikum er samde med oss, seier han.
– Og du vil ikkje seie kven som har vunne fagjuryen sin heiderspris?
– Eg kan røpe så pass at det er ein fargefilm.