Sommarskisenteret på Strynefjellet slit atter ein gong med lite besøk.
Årsaka er enkel: Vêret både i mai og juni og no på høgsommaren har mildt sagt vore dårleg. Kombinert med tåke og elendig sikt gjer at skisenteret fleire periodar i sommar har vore stengd.
I tillegg vart opninga utsett ei veke til 29. mai fordi vegen opp til skisenteret ikkje var brøytt.
– Det er godt med snø i anlegget og forholda er supre når været er bra. Men vi har vore veldig uheldige med været i år, noko som sjølvsagt har gått ut over besøkstala, seier Idar Aaboen som er eigar og dagleg leiar ved sommarskisenteret.
- LES OGSÅ:
- LES OGSÅ:
Treng tidleg opning
Han fortel at det var spesielt uheldig at opninga måtte utsetjast ei veke.
– Det var veldig mange skifolk på plass i området til den planlagde opningshelga. Det var difor svært uheldig at oppstarten måtte utsetjast ei veke. Det er avgjerande for skisenteret sin framtidige eksistens at vi får opna så tidleg som vi ønskjer, seier Aaboen.
Han er i dialog med Statens vegvesen om tidlegare brøyting neste år.
- LES OGSÅ:
- LES OGSÅ:
Må snart stenge for sommaren
Redusert storleik på snøbreen i heisområdet gjer at skisenteret ikkje kan halde oppe lenger enn til 19. juli.
– Vi håper på godt ver og mykje besøk dei siste vekene, seier Aaboen.
– Blir det stort underskot i år?
– Det ønskjer eg ikkje å kommentere.
– Er det fare for konkurs?
– Nei, på ingen måte. Det vil bli drift også neste sommar, seier Aaboen.
Eig skisenteret åleine
45-åringen frå Skjåk kjøpte sommarskisenteret etter at det gjekk konkurs i fjor. Han har sjølv alle aksjane i selskapet.
Den samla gjelda var på 2,8 millionar kroner etter konkursen i fjor. Hovudaksjonærane Moods of Norway, Nordfjord Kjøtt og Stryn kommune tapte pengar. Også tidlegare eigarar og drivarar har hatt store problem med å få sommarskisenteret til å gå i pluss.