Dalsfjordbrua fører til hytteboom

Milliardbrua står ikkje ferdig før i desember, men allereie no merkar Fjordlagunen Feriesenter ein sterk oppgang i hyttesalet.

Dagleg leiar Cecilie Utne gler seg over utviklinga.

– Brua betyr veldig mykje. Til no har vi selt kanskje ei eller to hyttetomter i året, men berre no i februar-mars har vi selt tre, seier Utne til NRK.no.

Fleire hyttekjøparar

Dalsfjordbrua er for alvor i ferd med å ta form, og når den står klar i desember skal den binde saman to kommunar på ein heilt anna måte enn før. Det dyre prosjektet har vore omstridd, men Cecilie Utne er blant dei som gler seg til den brua står ferdig.

Saman med mannen Rolf har ho satsa millionar på etableringa av Fjordlagunen Ferie- og Fritidssenter i Vårdal i Askvoll.

• LES OGSÅ: Satsar tosifra tal millionar på ferieparadis

Ho seier dei merkar godt at området verkar bli interessant for fleire hyttekjøparar.

– Før var det mange frå Førde, men no ser vi at det er fleire som kjem frå Høyanger.

• LES OGSÅ: Gjennomslag for Dalsfjordbrua
• LES OGSÅ: Skal bruke 800.000,-på brufest

(Artikkelen held fram under biletet)

Gler seg over interessa

Også ordførar i Askvoll kommune, Frida Melvær, er glad for endringane brua fører med seg.

– Mellom anna set vi jo veldig stor pris på at etterspurnaden etter hyttetomter og hustomter aukar, seier Høgre-ordføraren.

Ho trur ikkje det er brua åleine som står bak auken i salet, og meiner det er mykje arbeid som ligg bak.

– Det handlar nok om god marknadsføring og at private grunneigarar har bygd ut og lagt til rette og synleggjort dette.

– Eg trur også at det at det opnar seg nye samband og vegar inn til kommunen gjer terskelen for å ta kontakt lågare, seier ordføraren.

Cecilie Utne trur brua vil bety mykje for framtida til Askvoll.

– Vi har ein nydeleg fin kyst, og eg trur folk kjem til å få auga opp for kor bra det er her.