Fjordhotella opplever det Kvikne kallar ei dramatisk endring i besøkstala frå utlandet.
- Vi hadde i underkant av 10 000 færre gjestedøgn frå utlandet i 2009 i høve til 2000, seier Kvikne.
Tapande fjordhotell
Sigurd Kvikne er ikkje den einaste hotellstyraren som ser at gjestene hans seglar forbi på fjorden utanfor hotellet hans.
Fretheim hotel i Flåm, Mundal hotel i Fjærland og Raftevold hotel i Hornindal tapte alle pengar både i 2008 og 2009.
Sigurd Kvikne har samanlikna tal frå 2000 med tal frå 2009.
- Det er fleire destinasjonar på Vestlandet som har ein tilbakegang på 30-40 prosent i talet på utanlandske gjestedøgn.
Utviklinga skjer samstundes som cruisetrafikken går mot nok ein rekordsommar.
Mot ny rekordsommar
Det er venta heile 132 cruiseskip inn Sognefjorden denne sommaren.
- Talet på skip til Norge vil auke med omlag 15 prosent, opplyser Wenche Nygård Eeg, direktør i Cruise Norway.
Norge er allereie den leiande cruisedestinasjonen i Nord-Europa.
- LES OGSÅ: Ventar 140 000 turistar
- Mange føretrekkjer cruisereiser fordi då har dei ein forutsigbar økonomi. Dei betalar heile reisa på førehand og unngår å vere usikre på valutasvingningar.
Avviser at cruise stel turistane
Nygård Eeg vil ikkje vere med på at det er cruiseskipa som er skuld i fjordhotella sin nedgong.
- Det vert ikkje riktig å seie at cruiseskipa er ein konkurrent til fjordhotella. Eg vil heller seie at cruiseskipa er eit supplement til hotella.
- LES OGSÅ: Sjå verdens største cruiseskip i Olden
Både cruisehamnene i Olden, Skjolden og Flåm vil auke talet på besøkande i år. Direktøren meiner hotella må klare å tilpasse seg den nye trenden med cruiseturisme.
- Kanskje hotella ikkje er nytenkande nok, spør Nygård Eeg.
Cruise tek gjester
Cruisetrafikken tek heilt klart gjester frå hotella, seier Wenche Salthella, bransjesjef i NHO reiseliv.
Salthella meiner hotella må forsøke å få til samarbeid med cruiseskipa.
- Dei må prøve å utvikle pakkeløysingar slik at cruisesturistane ikkje berre reiser forbi på fjorden.
Håp om betring
Etter finanskrisa og fleire år i motbakke ser det litt lysare ut for hotella framfor denne sesongen. Også Kvikne seier bestillingane er betre enn dei tidlegare åra.
- Dette er førehandsbooking, så gjeld det å sjå kor mange som faktisk kjem.
Walaker Hotel i Solvorn opplevde ein rekordsommar i fjor. Også bestillingane føre årets sesong er lovande.
Nordmenn vel ferie i Norge
Trass dyster utvikling frå utlandet siste åra, kan hotella gle seg over at stadig fleire nordmenn vel å feriere i eige land.
Til dømes er 80 prosent av gjestene på Walaker Hotel norske. Dei merkar difor ikkje endringar på grunn av auken i cruisetrafikken.
Også Salthella i NHO reiseliv ser at fleire nordmenn vel Norges-ferie.
- I år ser vi ein 13 prosent auke i talet på gjestedøgn av nordmenn, seier Salthella.