Har sløkt brann i båtfabrikk

– Brannen er no sløkt, seier Frode Korneliussen, som er vaktleiar ved Alarmsentralen i Florø.

Det var onsdag kveld at naudetatane rykte ut til Øien båt på Stårheim, etter at ein forbipasserande oppdaga flammar inne i båtfabrikken. Brannen førte til ein del røyk på staden.

– Det er alltid ein fare når ein sånn type fabrikk brenn. I båtfabrikkar har ein ofte mykje brennbart materiale, men brannmannskap fekk sløkt brannen raskt, seier Korneliussen.

Vaktleiaren fortel at det stod flammar ut vindauga på bygget, og at det var flammar langs veggen.

– Brannen var konsentrert til eit avgrensa område, så det hjelpte på i sløkking av brannen.

Politiet rosar dei som oppdaga brannen.

– Dei starta umiddelbart med sløkking. Det var med på å hindre at heile fabrikken tok fyr, og at store verdiar gjekk tapt, seier politibetjent Eivind Bjørke.

Inne i fabrikken blir det produsert båtar i plast. Politiet meiner brannen fort kunne blitt verre.

– Her kunne det gått veldig gale. Det er giftige ting som er inne på ein sånn stad, seier Bjørke.