Bil har køyrd i fjellveggen i Naustdal – éin person til sjukehus

Alle naudetatar rykte ut til Naustdalstunnelen på riksveg 5 mellom Førde og Florø etter meldingar om ei ulukke like over klokka 23 fredag kveld.

Forbipasserande skal ha meldt inn at ein bil køyrde i fjellveggen på sørsida av tunnelen i Sunnfjord.

– Det me har fått opplyst er at ein bil har køyrd i fjellveggen. Ein person er medvitslaus, og luftambulansen tar seg no av pasientbehandling av denne personen, sa operasjonsleiar Tatjana Knappen klokka 23.30.

Det blei store materielle skader på køyretøyet.

– Det er større ytre skader og airbagar er løyste ut. Tilstanden til den skadde er ukjend, opplyser Knappen til NRK.

Var uklart om fleire var involvert

Vitneobservasjonar gjorde at politiet var usikre på om den skadde personen var åleine i bilen. Politiet gjorde omfattande undersøkingar og sikra spor på staden.

I tillegg prøver politiet å kartlegga hendingsgangen før ulukka.

Eit vitne skal ha observert to personar.

– Det var litt uklart ein periode. Det har vore andre i tilknyting til bilen like før, men dei var ikkje i bilen då ulykka skjedde. Politiet har vore i kontakt med alle partane, seier operasjonsleiar Eivind Hellesund til NRK i 07:30-tida laurdag morgon.

Det var brannvesenet som kom først fram. Den skadde sat i bilen ein periode før vedkomande blei tatt ut. Politiet opplyser om at det av helsemessige årsaker kan ta litt tid før redningspersonell tar skadde ut av køyretøyet.

– Eg har ikkje fått opplysingar om at vedkomande sat fastklemd, sa Knappen fredag kveld.

Riksveg 5 stengd

Pasienten blei frakta til Førde sjukehus med ambulanse.

– Personen var då medviten, seier Hellesund.

Skadeomfanget er førebels ukjend. Politiet har oppretta sak og vil no undersøkje vidare kva som har skjedd.

Ulukka har skjedd på utsida av tunnelmunninga på sørsida av tunnelen. Riksveg 5 var stengd etter ulykka, men blei opna att i natt.