Endringane vil hovudsakleg føre til høgare restvassføring i Vigdøla, med dei positive følgjer dette har for landskap og naturmiljø.
Planendringane vil også føre til ein noko lågare produksjon i kraftverket.
- Les også:
– I søknaden vår er maskininstallasjonen i kraftverket redusert frå 16 til 8,5 MW. Det vil mellom anna imøtekomme kravet om større restvassføring i Vigdøla nedanfor inntaket, seier Norman Kjærvik, informasjonssjef hos Statkraft.
Betre økonomi
Statkraft har planar om å utnytte vasskreftene i elva Vigdøla, men fylkesmiljøvernavdelinga retta ein peikefinger mot miljømessige negative følgjer ved redusert vassføring nedanfor inntaket.
Auka kostnader og reduserte energiprisar har også gjeve prosjektet ein merkbar svakare økonomi. Dette betrar seg med dei planlagde endringane.
- Les også:
– Økonomien i prosjektet blir òg betre fordi grunnrenteskatten fell bort, slik regjeringa har lagt opp til i statsbudsjettet for 2015, seier Kjærvik.
Redusert produksjon
Restvassføringa aukar, då slukeevna i kraftverket går ned frå 3,2 kubikkmeter i sekundet, til 1,7 kubikkmeter i sekundet.
- Les også:
– Vi held oppe nivået på minstevassføring vår og haust, slik vi opphavleg søkte om. Det vil seie 0,3 kubikkmeter i sekundet i periodane 1. mai til 30. juni og 16. august til 30. september, seier Kjærvik.
Statkraft søkte opphavleg om å produsere kring 49 GWh i året. NVE sitt krav om auka minstevassføring vår og haust reduserte dette til kring 47 GWh i året.
Små naturinngrep
I det nye alternativet det no blir søkt om vil kraftproduksjonen ligge på om lag 35 GWh/år.
- Les også:
– Så produksjonen blir ein god del mindre enn opphavleg omsøkt, seier Kjærvik.
Planane har vore omstridd og naturvernarar har prøvd å stogge utbygginga. Kjærvik meiner kraftutbygginga medfører relativt små naturinngrep.
– Det blir etablert eit lite inntak i om lag 600 meters høgde i Vigdalen, vatn blir ført gjennom tunnel og trykksjakt ned til ein ny stasjonshall like ved Jostedal kraftstasjon, og avløpsvatnet blir ført i eksisterande undervasstunnel til Gaupnefjorden. Vi vil også nytte eksisterande kraftliner ut frå kraftstasjonen, seier Kjærvik.