Har opplevd å bli undervurdert av gutar

Ariza Hina opplever framleis å bli undervurdert av gutar i sjakkmiljøet. No ber ho jentene ta kampen på sjakkbrettet.

– Ein motspelar hadde fem-seks vener som kviskra at han måtte vinne lett mot ei jente, seier Ariza Hina.

16-åringen har alt gjort seg merka i sjakkmiljøet, både som kurshaldar og som ekspertkommentator på TV.

Då ho starta var ho den einaste jenta som spelte sjakk i miljøet der ho bur.

Fleire gonger har ho opplevd at gutar undervurderer ho, fordi ho er jente. No held ho eigne sjakk-kurs for jenter, for å få fleire med seg.

Hina fortel at den mannlege motstandaren vart raudare og raudare i andletet for kvart trekk ho tok.

– Etter 20 trekk inn i partiet sto eg eit tårn over, hadde eit kjempeangrep, og knuste han, seier Ariza Hima.

– Stas å sjå gutane bli heilt stille

No arbeider ho for å få fleire jenter til å spele sjakk gjennom eigne jentekurs.

I ein liten kjellar i Bergen sentrum er fleire samla. Her blir det diskutert strategiar, og kva som kan vere smarte trekk på spelebrettet.

Sjakk blir meir og meir populært. Den fyrste bølgja her til lands kom då Magnus Carlsen slo gjennom som verdas beste sjakkspelar.

No er det den populære TV-serien Queen's Gambit som lokkar stadig fleire til sjakkbrettet, der ei sjakk-spelande kvinne har hovudrolla.

– Det er den beste delen med sjakk som jente, å sjå at gutar verte heilt stille fordi du knuser dei, ler ho.

Maia Sognefest er blant kvinnene i alle aldrar som deltek. Dei sit på rad og rekke ved kvart bord. Alle spelar mot Ariza, dei fleste taper, men ei av dei klarer ein remis (uavgjort).

– Dette er veldig kjekt. Det er mykje tryggare når ikkje dei «skumle gutane» er her, ler ho.

Vil ha med fleire jenter

I Noregs sjakkforbund er kvinneandelen berre 6 prosent av dei rundt 4000 medlemane, ifølgje generalsekretær i forbundet, Eirik Natlandsmyr.

– Vi er nok blant dei dårlegaste på kjønnsbalanse, seier han.

Han ynskjer å få med fleire kvinner.

– Viss ikkje så har vi mislukkast.

Også Ariza Hana ynskjer å gjere noko med situasjonen. I fleire år har 16-åringen halde kurs for born og vaksne av begge kjønn, men no også kurs berre for kvinner.

– Mange av jentene fortset etter kurset, fortel Hana.

Ein av deltakarane er Ivy Lee Skanke. Ho trur at litt av presset forsvinn når det berre er jenter på eit kurs.

– Etter Queen’s Gambit er det veldig mange fleire som har hatt lyst til å prøve sjakk. Det pushar oss til å prøve det neste steget, seier Skanke.