Klokka 04.30 onsdag morgon, melder Jernbaneverket at Bergensbanen er opna att etter at betongportalen ved Arna er blitt sikra.
Det var klokka 13.15 etter ei salve under arbeidet med det nye løpet av Ulrikstunnelen skadane vart oppdaga. Den nye tunnelen blir bygd parallelt med den gamle og rutinen er at det vert gjennomført ein sjekk etter kvar salve for å oppdage skadar.
– Etter ei salve klokka 13.15 oppdaga vi sprekkar i tunnelportalen mot Arna stasjon. Dette må vi sjekke nærare før vi veit om ein kan setje inn trafikk, sa pressevakt i Jernbaneverket Inge Hjertaas tysdag.
Måtte sikre med boltar
– Vi må inn med boltar og sprøytebetong for å sikre tunnelopninga, sa pressevakt Inge Hjertaas i Jernbaneverket tysdag.
– Først når vi går i gang med arbeidet vil vi sjå det fulle omfanget av skadane. Det er ein fare for at arbeidet vil ta lenger tid enn planlagt. men det er snakk om timar før det er fullført, ikkje dagar.
Buss for tog
Inntil vidare vart det køyrt buss for tog mellom Bergen og Arna og mellom Bergen og Stanghelle. Passasjerar som skulle til Oslo vart køyrde til Dale stasjon.
Andre uhell på kort tid
I slutten av februar i år var det og eit uhell under arbeidet i den same tunnelen. Då vart det fyrt av ei salve på utsida av tunnelløpet, medan to personar var inni tunnelen.
– Hadde dei inni tunnelen blitt treft av steinane, kunne det gått gale. Men til alt hell er ingen blitt skadd, sa Jernbaneverket då.
