I strålande vårsol møtte tusenvis av feststemde bergensarar opp på Torgallmenningen for å hylla cupheltane sundag ettermiddag.
Med 2–0 mot Lillestrøm tok Brann sitt sjuande NM-gull, og kunne med det ta gullet og kongepokalen «hem» til Bergen.
Alt lenge før gullet var sikra, hadde kommunen varsla gullfest dersom Brann drog i land sigeren mot Lillestrøm.
Og bergensarane møtte opp i tusental.
Feira sitt aller første gull
– Det er første gong i mitt liv at Brann vinn noko, så det er ganske gøy. Eg har sett mange Brann-kampar, og endeleg vinn dei gull. Det er ganske fantastisk, seier Sander Ospehaug Borge.
Han hadde tatt turen i lag med familien og kompisen Edvard Bratli Nordang.
Rundt han var det trongt om plassen.
– Eg har høyrt rykte om at det er mellom 13 og 15.000 her i dag, sa Brann-speaker og konferansier Remi Taule før han ropte opp Brann-spelarane éin etter éin.
– Dette går ikkje an å beskrive. Det er ein draum, sa kaptein Sivert Heltne Nilsen etter å ha løfta pokalen blant byens supportarar.
Ordførar med kjærleikserklæring
Bergensordførar Linn Kristin Engø (Ap) opna sceneshowet med ei kjærleikserklæring til 2-0-skåringa i gårsdagens finale.
– Ingen har sett hjarta mitt meir i Brann enn då Bård Finne sende meir enn halve Ullevål og heile Torgallmenningen til himmels i går, konstatert Engø til unison jubel frå folkehavet i sentrum.
– Dette er heilt ubeskriveleg, seier Nils Brennedal.
Laurdag hadde han jobben som forsongar under fellesvisinga på Torgallmenningen. Dagen «derpå» er han hås, og røper at han finaledagen drakk så mykje vatn i varmen at han kasta opp.
– Ingen plassar i verda er det meir stemning no, trur eg.