Bedriftsleiar oppmodar næringslivet om å rekruttere tilsette lokalt

Slik det er i dag blir berre kring halvparten av dei nyutdanna frå Høgskulen i Sogn og Fjordane verande i fylket når dei er ferdige med utdanninga.

Ole Petter Hatlevoll er dagleg leiar i breibandsselskapet Sognenett, og har sjølv gjort det han meiner mange fleire andre i næringslivet burde gjere. Nemleg å rekruttere nettopp dei som har gått på skule i nærområdet.

Hatlevoll har tilsett ein nyutdanna økonom og meiner dette er vegen å gå.

– Eg oppmoda heilt klart til å bruke det vi har i fylket for det det er. Høgskulen er ein bra ting, og eg meiner folk rett og slett bør sjekke marknaden der når ein er ute etter arbeidskraft, seier Hatlevoll til NRK.no.

Kunne ikkje seie nei

Bedriftsleiaren i Sogn håpar fleire vil gjere som han, rekruttere nyutdanna studentar direkte til spennande jobbar.

Hatlevoll har sjølv tilsette ein ung mann frå Bergen, Tobias Brattebø kunne ikkje seie nei til jobbtilbodet han fekk.

– Det er eigentleg berre heilt konge. Eg får drive med alt frå sal, til leveranse og til det å snakke med kundar. Det passar flott med det eg er utdanna til, seier Brattebø.

(Artikkelen held fram under biletet)

Halvparten reiser frå fylket igjen

Kvart år utdannar Høgskulen i Sogn og Fjordane kring 460 bachelor- og masterkandidatar. Av desse vert om lag halvparten att i fylket, noko som i stor grad skuldast at lærar og sjukepleiarutdanninga har mange lokale studentar.

Rektor ved Høgskulen i fylket, Åse Løkeland, er samd i at det må til eit tettare samarbeid med næringslivet for å få endå fleire av studentane til å satse på ei karriere i Sogn og Fjordane.

– Det er ingen ulempe viss det skjer, seier ho.

– Vinn-vinn

Bergensaren Tobias Brattebø angrar ikkje på valet om å halde fram i jobb på same i området der han studerte.

– Det er ein vinn-vinn-situasjon. Studentane får jobb, næringslivet frå arbeidskrafta dei treng og høgskulen får popularitet, seier Brattebø.