For å møte etterspurnaden etter straum ynskjer Frp i Sogn og Fjordane å byggje atomkraftverk i fylket.
- LES OGSÅ:
Distriktssekretær i LO Arvid Langeland er sterkt skeptisk til forslaget. I Sogn og Fjordane ser folk ut til å dele den oppfatninga.
Høyr radiosaka her (saka held fram under innslaget):
Fører ingen stad
Langeland seier forslaget er useriøst. Han trur ikkje dette er vegen å gå:
– Atomkraft er ikkje noko folk i Sogn og Fjordane, eller Noreg for den del, vil ha som energikjelde. Det er eg heilt overtydd om, seier Langeland.
Heller ikkje mange innbyggjarar i fylket ser ut til å ynskje ei satsing på atomkraftverk:
– Det ser eg helst at dei ikkje gjer, seier ei dame på gata i Førde.
Atomkraft vel så trygt
Djuvik meiner førestillingane om atomkraft som ei utrygg energikjelde er gamaldagse. Han seier teknologien har kome langt:
– Eg vil hevde atomkraftverk i dag er vesentleg mykje tryggare enn oljeinstallasjonane våre i Nordsjøen, seier Djuvik.
Djuvik legg vekt på at eit atomkraftverk ligg langt fram i tid. Han seier Frp dessutan vil satse vidare på fornybar energi.
Feil fokus
Langeland i LO meiner Frp bør leggje denne diskusjonen daud. Han seier utspelet frå Frp er eit blindspor, og tykkjer partiet heller kan fokusere meir på fornybar energi.
– Dei kan konsentrere seg om samarbeidet kring utbygging av vindkraft. Det er riktig satsing, avsluttar Langeland.