Dagleg leiar Håkon Ivarson er letta over at dei fekk skipa ut avfallet søndag.
To lange år
- Det er veldig viktig for oss. Vi ønskjer å avslutte Vest- tank kapittelet så fort som mogleg, seier Ivarson.
To år og tre månader er gått sidan to tankar med svovelhaldig avfall gjekk i lufta ved Vest Tank sitt anlegg i Sløvåg i Gulen.
Dette var starten på eit mareritt for innbyggarane i lokalsamfunnet.
For avfallet har fått skulda for å gje fleire hundre innbyggjarar til dels alvorlege helseplager. Dei nye eigarane av anlegget, Alexela Sløvåg, hadde frist til sjuande august med å bli kvitt avfallet.
- No var vi heldige og fekk transportert siste rest av avfallet ut på søndag. Noko av dette var olje som vert levert i Danmark som vi faktisk får betalt for, forklarar han.
Stinka
Avfallet etter eksplosjonen låg lenge oppe i dagen og skapte ein uuthaldeleg stank i nærmiljøet.
Fleire hundre personar rapporterte om alvorlege helseplager og lokalsamfunnet kjente seg åleine mot omverda.
SFT har fleire gonger kravd at avfallet vert fjerna. Men dei nye eigarane Alexela Sløvåg har brote frist etter frist. No klarte endeleg selskapet i å få fjerna avfallet.
Vil starte på ny
- For vår del, området og kommunen sin del har skaden allereie skjedd. Dette har skada omdøme vårt, seier nabo Gjermund Halsvik.
Alexela Sløvåg håpar no på å få nytt driftsløyve av miljøstyresmaktene, dette vil bli avgjort i haust.
Då kan det på nytt bli aktivitet ved tankanlegget i Gulen.
Men skandalen kring Vest Tank har framleis ettervirkningar i lokalsamfunnet. Halsvik seier at alt i denne saka har teke for lang tid.
- Det er klart det. Det er trass alt to år sidan, så det seier seg vel sjølv at det har teke for lang tid, seier Halsvik.