- Grunnen er enkel: Det er to veldig spennande jobbar i Sogn og Fjordane. Den eine jobben har eg og den andre har blitt ledig, seier Bolstad.
Søkjarlista til stillinga som fylkesmann i Sogn og Fjordane vart tysdag klar:
- Jon Bolstad (43). Administrerande direktør. Førde.
- Tor Bremer (56). Stortingsrepresentant. Hafslo.
- Ole Schanke Eikum (41). Konsernsjef. Sandane.
- Gjermund Hagesæter (50). Stortingsrepresentant. Isdalstø
- Marta Finden Halset (60). Ordfører. Vik i Sogn.
- Anne Karin Hamre (45). Assisterande fylkesmann. Sogndal.
- Erling Valvik (57). Administrerande direktør. Kristiansand.
- Jostein Aanestad (48). Rådmann. Sogndal.
NRK Sogn og Fjordane sin politiske kommentator Knut Henning Grepstad har like vel klare favorittar til jobben som Oddvar Flæte sin etterfølgjar: Stortingsrepresentantane Tor Bremer og Gjermund Hagesæter.
- Ut frå praksisen og det som tidlegare har vore bildet rundt slike tilsettingar så trur eg Bremer er favoritten, seier Grepstad, som trur politisk bakgrunn er det viktigaste ein søkjar til fylkesmannsjobben kan ha.
Politisk bakgrunn viktig
- Fylkesmennene i landet er i all hovudsak rekruttert frå det politiske nivået. Skal ein nå opp og vere med og hevde eit fylke sine interesser er det ein stor fordel med bakgrunn i politisk arbeid, seier Grepstad.
Han meiner søkjarar som Ole Chanke Eikum som i dag er konserndirektør i Sogn og Fjordane energi og Bolstad viser at jobben er attraktiv, sjølv om berre søkte på jobben første gong den var utlyst.
- Arbeiderpartiet sin tur
- Vi har jo sett nokre gonger at dei har tilsett fylkesmenn med administrativ bakgrunn, men dei er veldig få. I den seinare tida har det vore veldig konsentrert om folk med politikarbakgrunn. Dei har turnert litt mellom partia, og slik sett står vel Arbeiderpartiet for tur til å få fylkesmannen.
Arbeiderpartipolitikaren Bremer sin stortingsperiode går ut i 2013, og det er vanleg praksis at stortingspolitikarar får gå ut perioden sin dersom dei blir tilsette som fylkesmenn.