– Dette er ein lettens dag. No veit eg endeleg kva som skjer, seier Arild Teigen.
Han har bygd huset på heimgarden i Kjødepollen i Stad kommune med eigne hender.
No skal det bli jamna med jorda. Men Arild fortvilar ikkje, endeleg kan han legge planar for åra som kjem.
– Eg har levd i eit vakuum her i ti år, og lurt på kva eg skal gjere. No veit eg korleis framtida ser ut.
Heimen hans ligg midt i innslaget til Stad skipstunnel. Heilt sidan 1980-talet har bygdefolket levd i uvissa – blir det tunnel eller ikkje?
Denne veka kom avklaringa. Etter årevis med utgreiingar sikra Frp byggestart i statsbudsjettet.
1000 milliardar på samferdsle
Nasjonal transportplan seier at Noreg skal bruke 1000 milliardar kroner på samferdsle i løpet av 12 år.
Over heile landet betyr det at folk må flytte frå heimane sine for å gi plass til vegar, jernbaner og tunnelar.
Men frå planane dukkar opp til spaden går i jorda, kan det ta lang tid.
I mellomtida må naboar leve i uvissa.
Og i Vestland er folk spente på kva følgjer ferjefri E39 vil få for bygdene dei bur i.
Grunneigarane skal få erstatning
Prosjektleiar for Stad skipstunnel, Terje Andreassen i Kystverket, har hatt mange møter med grunneigarane.
Til samen må fire bustadhus rivast. Men etter 30 år med debatt, og 20 statlege utgreiingar kan bygdefolket få ro.
– Ein kan berre prøve sjølv å førestille seg denne uvissa, seier Andreassen.
Kystverket har henta inn takst og opplysningar om eigedomane.
– Vi har laga eit forslag til minneleg avtale som vi skal forhandle med grunneigarane om. Eg håpar dei blir nøgde. Utgangspunktet er erstatning til attkjøpsverdi i nærområdet, seier Andreassen.
Blanda kjensler for far og son
– Eg synest det er bra at tunnelen kjem, no får vi litt statlege investeringar her på kysten også, ikkje berre i Oslo-gryta, seier Arild Teigen.
Men for faren Kåre Teigen er det verre. Han må sjå garden han har budd på heile livet bli øydelagt.
– Ein jævlige dag. Eg tenker på foreldra, besteforeldra, og meg sjølv som bygde opp garden. No er det over.
Men sonen må sjå framover.
– No er det å starte på nytt på ein ny plass. Eg flyttar til nabobygda Bryggja, eg har hustomta klar, seier han.
- Les også: