Stortingsrepresentant Ingrid Heggø (Ap) vedgår at partiet føreslår ei drastisk endring, på eit drastisk tilbod frå dei blå regjeringspartia.
Mellom anna føreslår dei å auke budsjettstøtta til landbruket med minst 450 millionar.
– Og strukturendringane som ville ført til store bruk, vil vi reversere slik at vi også varetek små og mellomstore bruk, seier Heggø til NRK.
Vil reversere endringar
Jordbruksforhandlingane var knapt komne i gang, før bøndene gjekk frå bordet med regjeringa. Dei ynskte ein auke på 1.5 milliardar kroner, medan tilbodet frå staten var ein auke på 150 millionar kroner.
Før forhandlingane braut saman, kom regjeringa med ytterlegare 100 millionar kroner. Regjeringa ynskte også å gjennomføre fleire strukturframlegg. Mellom anna å heve kvotetaket frå 400.000 liter til 1,2 millionar liter.
Desse vil Ap reversere.
– Vi vil ikkje ha fullt så stor auke på matprisane, spesielt på frukt og grønt. Vi ynskjer styrka kornøkonomi og inga fjerning av tidleg pensjonsordninga. Vi vil også at miljø- og klimatiltak skal halde fram, og går ikkje med på auke mjølkekvote som er føreslått, seier Heggø.
– Spennande, men ...
– Eit interessant og positivt framlegg, seier leiar Per Hilleren i Sogn og Fjordane bondelag. Noko jubel vil han vente med til Stortinget har handsama oppgjeret i midten av juni.
– Det er spennande, men vi får vente å sjå kva som kjem, seier han vel vitande at framlegget frå Arbeidarpartiet vil trenge brei politisk støtte for å bli ein realitet i Stortinget.
Regjeringspartia Høgre og Framstegspartiet forhandlar i dag med støttepartia KrF og Venstre om jordbruksoppgjeret. Denne støtta er naudsynt for å kunne banke gjennom tilbodet i Stortinget.
Må ha V og KrF
Sjølv om Ap skulle få med seg både Senterpartiet og SV, er også dei avhengige av støtta frå sentrumspartia for å nå fram med det dei meiner er eit akseptabelt jordbruksoppgjer.
– Dei raudgrøne og dei grøne vil nok støtte noko slikt, men V og KrF veit vi ikkje. Dei forhandlar vidare med regjeringa i dag, men dette er noko dei absolutt bør ta med seg til forhandlingsbordet, seier Heggø og håpar å sjå regjeringa sine støtteparti ved eit forhandlingsbord.
– Vi kan også forhandle, seier ho.