«Sjølv om eg ikkje får kome tilbake til Noreg må eg vekk herifrå»

– Eg tør ikkje å vere her. Uansett om eg ikkje for lov å kome tilbake til Noreg må eg vekk frå denne staden, seier Fatah i Skypesamtala med Rudi Bakken.

Det er seks år sidan 27 år gamle Taiman Agid Fatah fekk endeleg avslag på asylsøknaden sin. 10. februar i år vart han tvangsutsendt.

• DETTE ER SAKA: Taiman (27) sendes ut etter 13 år i Norge

Tvangsutsendt etter 13 år

29. april bestemte utlendingsnembda (UNE) at dei vil behandle saka til Agid Fatah på nytt. Om éi veke blir Fatahs sak behandla på nytt i nemdmøte.

27-åringen kom til Noreg frå Irak med familien sin i 2001. Far til Fatah hadde reist frå landet to år i førevegen, og i 2005 fekk resten av familien opphaldtillatelse. Men ikkje Fatah.

I 2008 fekk han endeleg avslag på asylsøknaden sin, og i januar i år bestemte myndigheitene seg for å tvangsutsende han.

10. februar i år vart han sendt ut av Noreg. Sidan har han vore i Irak i byen Zakho, som ligg nordvest i landet, like ved grensa til Syria, Tyrkia og Irak.

I Skypesamtala med kameraten er det tydeleg at Fatah ynskjer å kome seg vekk frå Zahko.

– Han er redd

Fatahs kamerat frå Bergen, Rudi Bakken, fortel at det var ei ubehageleg samtale han hadde med kompisen sin tysdag kveld.

– Byen blir fylt opp med flyktningar frå Shingal. ISIL sine styrkar er berre ein time unna. Eg tør ikkje vere her, seier Fatah i Skypesamtala.

– Han er frykteleg redd og føler seg ikkje trygg i byen. Alt han vil er å kome heim til Bergen, seier Bakken.

Bakken fortel at det ikkje er ofte han får snakka med Fatah, men at dei har snakka eit par gonger i månaden sidan han reiste i februar.

– Det er ikkje så ofte han har tilgang på Internett, då blir det litt vanskeleg å få snakka. Men me tenkjer på han heile tida.

Stort engasjement

At Fatah blei tvangsutsendt frå Noreg har fått mange i Bergen til å reagere. Demonstrasjonar, fakkeltog og støttekonsertar er berre nokre av tiltaka vener og kjenningar har stelt i stand for å få myndigheitene til å snu i saka.

• LES OGSÅ: Sluttar i protest mot utkasting
• LES OGSÅ: Her venter Taiman (27) på å bli sendt ut

– Me vil gjere alt me kan for å få han heim. Han har det ikkje noko bra der han er no. No håpar me at UNE gjer det som er rett, seier Bakken.