– Sylvi er ei lysande stjerne!

– Sylvi er ei lysande stjerne! Ho står rakrygga i debatten. Vi må sende ho ein stor takk.

Det sa leiar Ernst Veum i Luster Frp på talarstolen under fylkesårsmøtet til Sogn og Fjordane Framstegsparti på Skei.

Eit samla fylkeslag strøymer over av lovord, beundring og respekt for integreringsminister Sylvi Listhaug (Frp).

Ho har stått for ei hard linje i asyl- og integreringspolitikken i Noreg.

Ei fersk meiningsmåling synte at ho ikkje berre er populær hjå sine partifellar.

• LES OGSÅ: – Har fått godt betalt for å være tydelig
• LES OGSÅ: Erna Solberg: – Regjeringen fremmer de forslagene vi mener er riktige

Blomar på vegen

Under den politiske debatten tok ei rekkje medlemmar av grasrota i partiet ordet for å hylle Listhaug.

– Eg vil at fylkeslaget skal sende Sylvi dei blomane ho treng på vegen vidare. Denne dama beundrar eg, sa partiveteran Svein Hansen frå Selje Frp.

Sentralstyremedlem og stortingsrepresentant Helge André Njåstad seier partiet sét pris på lovorda til ein av statsrådane.

Står i stormen

– Det er veldig hyggeleg at Sylvi får skryt frå grasrota. Det er gjerne på sin plass med tanke på den stormen ho står i. Det varmar heilt sikkert.

– Skapar de problem for dykk på Stortinget som skal samarbeide med KrF og Venstre at ho er så hard i asylpolitikken?

– Nei. Det er eit problem for oss at parti som har vore med på forlik snur 180 grader. Men det er ikkje Sylvi sitt ansvar at andre parti meiner ein ting i desember og noko anna i februar, seier Njåstad.

Surt samarbeid?

Fylkesleiar Lars Svein Drabløs fortel kvifor det var viktig for dei å gje si støtte til Listhaug:

– Ho står for den klare talen som har vore partiet sitt varemerke i alle år. Ho er roleg, beherska og tek debatten med eit smil. Før ho klinkar til med Frp sin politikk.

– Ho blir skulda for å vere unødvendig hard i retorikken og for å ha forsura samarbeidet med KrF og Venstre. Kva seier du til det?

– Det er slik at for å få fram ein bodskap må du spisse uttalane dine litt. Det har ho gjort. Vi må ha ein berekraftig innvandringspolitikk. Og eg trur når partia får forhandla så vil dei bli einige til slutt.

Opphavleg låg det tre resolusjonsforslag om at alle asylmottak skal gjerast om til lukka mottak, at Norge bør ut av delar av Schengen-avtalen, og at asylsøkarar og kvoteflyktningar berre skal ha mellombels opphald. Desse tre vart trekt til fordel for den vedtekne støtta til Listhaug.

Hva mener partiene om temaer som er viktig for deg?

Partiguiden til NRK gir deg oversikt