Senterparti-ordførar Karl Vidar Førde har blitt skulda for kameraderi, etter at olje- og energiministeren valde å flytte kraftlinja vekk frå heimtraktene hans.
No viser det seg at Førde på eiga hand sende partikamerat Einar Kjerpeseth for å drøfte val av kraftlinjetrase med regjeringa. Dette skal han gjort utan å informere resten av Bremanger Senterparti.
Innbyggjarane i Myklebustdalen, som no blir råka av kraftlinja er rasande. Dei meiner dette er eit bevis på at ordføraren har misbrukt rolla si.
– Når han sender ein nær partikollega som han veit kor står i saka på eit slikt møte, utan å informere resten av gruppa, då trer han klart inni saka slik eg ser det, seier Lars Endre Myklebust som er ein av innbyggjarane i Myklebustdalen.
Flytta trase – mot alle fagleg råd
Frontane i Bremanger er harde etter at regjeringa uventa gjekk inn for at den omstridde kraftlina gjennom Sogn og Fjordane skulle gå gjennom Myklebustdalen i Ålfoten i Bremanger.
Saka har vekt nasjonal oppsikt fordi alle faglege råd var eintydige på at alternativet gjennom Førdedalen har langt færre ulemper, men i tolvte time flytta regjeringa lina vekk frå det som er heimtraktene til Bremanger-ordførar Karl Vidar Førde frå Sp. At det var partifelle og minister Ole Borten Moe som gjorde dette har fått folk til å reagere.
Frå før har VG avslørt at Borten Moe i mai flytta ein liknande høgspenttrase vekk frå barndomsheimen til noverande fylkesvaraordførar Jenny Følling, også ho frå Senterpartiet.
- LES OGSÅ:
- LES OGSÅ:
Sendte kollega – utan å seie frå
Førde har heile tida sagt han har vore ugild og ikkje blanda seg inn i striden, men no vedgår partifellen Einar Kjerpeseth at det var ordføraren personleg som sendte han til Oslo i november for å drøfte kraftlinetraseen med regjeringa.
Dette skal ha blitt gjort utan at resten av Bremanger Sp visste det.
– Eg fekk ein førespurnad frå ordføraren om å møte på vegner av han, som naturleg nok var ugild i saka. Hadde eg vore lokallagsleiar hadde eg ville konsultert heile styret, men det vart ikkje naturleg for meg, seier Kjerpeseth til NRK.no.
(Artikkelen held fram under biletet)
– Eg hadde dessverre rett
Lars Endre Myklebust meiner Karl Vidar Førde med dette har vore ein aktør i det politiske spelet om kor kraftlina skal gå i Bremanger. Myklebust har tidlegare gått ut og sagt at grunneigarane i Myklebustdalen kjenner seg som offer for ein politisk hestehandel.
– Eg stiller spørsmål ved dei demokratiske prosessane. Ordføraren i kommunen her bur i Førde, og er Sp-politikarar. Og statsråden er Sp-politikar, sa Myklebust til NRK.
Då han får vite at det var Førde som sendte Kjerpeseth på møtet reagerer han slik.
– Det er veldig beklageleg. Eg har brukt mykje tid på å tenkje på kva eg tidlegare har sagt i saka om koplingar, noko eg har fått mykje reaksjonar på. No viser det seg dessverre at det er riktig, seier Myklebust oppgitt.
– Det gjekk vel litt fort føre seg
Bremanger-ordførar Karl Vidar Førde har måtte tåle harde skuldingar om å ha utnytta rolla si etter at kraftlina unngjekk heimbygda.
Han vedgår no at han burde konferert med resten av Bremanger Sp om kven som skulle fronte deira syn opp mot departementet.
– Det gjekk vel litt fort føre seg. Vi måtte berre få nokon sendt på møtet. Sidan eg har kjent meg ugild i saka måtte vi sende nokon som hadde vore med på prosessen i kommunestyret heile vegen, og difor vart Kjerpeseth vald, seier Førde.
Han nektar for at Bremanger Senterparti skal ha ønskt at det kom i stand eit møte med Olje- og energidepartementet, og seier han vart kontakta av fylkesleiinga i Senterpartiet for å finne ein person som kunne stille på møtet.
(Artikkelen held fram under biletet)
Forsvarar ordføraren
Men Einar Kjerpeseth seier på si side at Bremanger Sp hadde bede om eit møte.
– Vi hadde bede om eit møte gjennom fylkeskontoret og via Erling Sande.
Kjerpeseth forsvarar ordføraren, og meiner Bremanger Sp ikkje har noko å skjule i denne saka, og at det var naturleg at han som har jobba mykje med kraftlinesaka reiste på vegner av partiet.
– Vi har eit klart vedtak som går på at linja ikkje skal gå gjennom Førdedalen, og vi har heller ikkje anbefalt at den skal gå gjennom Myklebustdalen. I staden har vi heile tida kome med alternativ til trase, seier Kjerpeseth.
Men Lars Endre Myklebust har ikkje tillit til Kjerpeseth.
– Han har jobba tett med Førde og ikkje på noko tidspunkt teke kontakt med oss for å få vårt syn. Så vi i Myklebustdalen er sikre på at vårt syn på saka ikkje har blitt fronta på noko møte med departementet, seier Myklebust.