– Nye vogntogreglar gir tryggare veg

Frå 1. januar blir reglane for vogntog ytterlegare skjerpa, og då må alle vogntog ha gode vinterdekk både på trekkvogna og hengaren.

– Eg er heilt overbevist om at det vil føre til betring av trafikktryggleiken at me no får krav til vinterdekk på alle hjul, seier seksjonssjef i Statens vegvesen, Tormod Gausdal.

– Billig investering

Når det regnar i låglandet, så er det gjerne snø på fjellovergangane. Jan Ove Halsøy i lastebileigarlaget i Hordaland har sett alt for mange vogntog som ikkje har vore skodd for fjellet.

– I forhold til å til dømes knuse eit vogntog eller påføre andre skadar, så er det faktisk billig å investere i gode vinterdekk, seier Halsøy.

– Då får du ein trygg, rask, effektiv, og god transport som gagnar dei som har kjøpt tenestene våre i tillegg til alle andre trafikantar, seier han.

– Kjærkomme tiltak

Skulle du koma i kontroll med 14 hjul som ikkje er vinterdekk vil det fort kosta deg gode 10 000 kroner.

Utrykkingspolitiet sin distriktsleiar på Vestlandet, Terje Oksnes, trur det vil ha stor effekt, ikkje minst på utanlandske vogntog.

– Alle køyretøy som er godt skodd gir betre trafikktryggleik, så dette er eit kjærkomme tiltak, seier Oksnes.

Har kontrollar

Seksjonssjef i Statens vegvesen, Tormod Gausdal har ansvaret for alle fjellovergangane mellom Vest og Aust. Han er i gang med kontrollar på E16 i Lærdal.

– Me køyrer ein intensivert kontroll framover, og vurderer føreforholda på fjellovergangane, seier han.

– Me held tilbake folk som ikkje har gode nok dekk for å komme over, seier Gausdal.