Klokka er om lag 18.30 mandag kveld denne veka.
På fjellet ved Dalamot i Ullensvang står ein familie og ventar på fleire familiemedlemmer som er på veg opp for å vera med og bygga hytte. Plutseleg ser dei helikopteret med sine kjære styrta i bakken. Ingen av dei fem ombord kunne reddast.
Høyrde om ulykka på radio
Dette blei starten på ei vanskeleg veke for mange i Ullensvang i Hardanger. Ein av dei som har vore mest sentral i handteringa av ulykka er ordførar Solfrid Borge.
Ho var på veg heim frå Oslo og var komen til Bromma då ho for første gong høyrde om ulykka på radioen.
– "Nei og nei, kva er dette for noko", var det første eg tenkte då, seier Borge.
Ti minuttar seinare blei ho oppringt av politiet og fekk beskjed om at det hadde skjedd ei helikopterulykke på Dalamot, og at det truleg var fleire omkomne.
Vanskeleg veke
Deretter gjekk det slag i slag med lokal kriseleiing, kontakt med pårørande, kontakt med journalistar og minnegudsteneste i kyrkja.
– Var du førebudd på noko slikt som dette?
– Nei, absolutt ikkje. Det har vore frykteleg hektisk, og sånn blir det i slike situasjonar. Viss eg tenkjer litt tilbake, så synest eg det har gått rimeleg bra, trass i den tragiske ulykka, seier ho.
Kva huskar du best frå den siste veka?
– Minnestunda på onsdag var ei krevjande oppgåve, samtidig som det var ei fin stund med rom for både stillheit og ettertanke, seier ordføraren.
– No kjem kvardagen
Kan du sjå noko positivt oppi dette?
– Det er jo ikkje noko meining i at fem personar skal omkoma på denne måten. Så dette er like tungt for alle. Men det er fint at ein har kunna samla familiane som er ramma så frykteleg hardt, seier ho.
Ordføraren seier det er svært viktig at alle tar godt vare på kvarandre og strekkjer ut ei hjelpande hand i lang tid framover.
– No kjem kvardagen for kvar og ein av oss, anten ein er pårørande eller har andre roller. Uansett om ein får eit godt svar på kva som har skjedd eller ikkje, så ein får ikkje tilbake dei ein har mista. Difor er utfordinga no å kunna leva vidare i kvardagen, seier ho.
Les meir:
| | | |Takkar dei som har bidratt
Ordføraren seier det er mange som har gjort ein stor innsats den siste veka og som fortener takk.
– Tankane mine går først og fremst til dei aller næraste som har mista sine kjære. Men eg vil og takka alle som har vore med og bidratt den siste veka i handteringa av ulykka og alt som har skjedd etterpå, seier ordføraren.