– Det er veldig ubehageleg å køyre forbi fjellet kvar dag. Eg tenkjer mykje på det, så det er herleg at ein no skal følgje betre med, eg blir glad av å høyre det. Det seier Ronja Hagan Bølge, som køyrer forbi det urolege fjellet kvar dag på veg til jobb.
Det har lenge vore kjent at delar av fjellet Stampa er uroleg, og i verste fall kan rase ut. Eit slikt ras kan skape ei stor flodbølge som vil rase inn mot bygda Flåm.
I dag har NVE annonsert at dei tek til med kontinuerleg overvaking av det ustabile fjellpartiet. Samstundes installerer dei eit oppdatert varslingssystem, i tilfelle ei flodbølge skulle sette inn.
Har levd med det lenge
Ordførar i Aurland, Noralv Distad, seier at det er godt å få ei avklaring.
– Dette har vore ei problemstilling lenge, og ulike rapportar har kome til ulike konklusjonar. Det er godt å endeleg få på plass ei skikkeleg overvaking, og eit godt system for varsling. Då kan vi halde fram som normalt utan å la oss plage av utryggleiken, seier Distad.
På nærbutikken i Flåm har dei fleste NRK treffer på eit forhold til fjellet og faren det utgjer.
– Vi har jo vore klare over at kan rase ned i over ti år no, men det er ikkje noko ein går og tenkjer på. Eg kjenner meg ikkje utrygg her i Flåm, eg kjenner meg så trygg som ein kan gjere å Vestlandet. Det seier Eirik Sønnerheim.
Ronja Hagan Bølge innrømmer derimot at ho tenkjer på det, og at det har vore noko som har skapt frykt.
– Om det skulle gå gale er det veldig mange liv som kan gå tapt, så eg føler vi ligg veldig utsett til om det skulle kome ei flodbølge i Flåm, seier Bølge.
Ein kommune som har opplevd mykje
Noralv Distad er letta, særleg med tanke på dei gongene det har gått gale i hans eiga tid som ordførar.
– Vi har heilt særeigne utfordringar her i Aurland. Dei siste 15 åra har vi sikkert brukt 70 millionar kroner på ulike typar sikring for flaum og ras. Også har det gått gale fleire gonger, og det er viktig for oss å få på plass meir tryggleik.
I juli i år raste kjempesteinar ut på E16 ved Gudvangen, i 2015 og 2013 brann det i Gudvangatunnelen og i 2014 vart bygda Flåm hardt råka av flaum. Kommunen er har mykje erfaring med ulukker og naturkatastrofar.
– Vi har opplevd mykje, og då er det klar det er ekstra viktig å få på plass denne tryggleiken, seier Distad.