– Dette er nok litt prega av desperasjon. Mannen er 41 år og har ikkje spela fotball i år, men samtidig har ikkje Sogndal så mykje å tape, seier ekspertkommentator Karl Petter Løken.
Han meiner Sogndal måtte gjere noko no med den skadesituasjonen som laget er i. Og trass i at han meiner det er risikofylt å hente inn ein pensjonert fotballproff, avviser han ikkje at Wæhler kan vere ein nyttig spelar å ha.
– Han har nok tapt seg litt sidan han la opp, men dei hentar ein rutinert kar som veit kva som gjeld. Han blir nok ikkje betre enn han var, men spørsmålet er om og kor raskt han kan bli god nok til å gjere ein forskjell for Sogndal, seier Løken.
LES OGSÅ:
Handla kjapt
Sportssjef Håvard Flo i Sogndal seier nettopp det med erfaring er ein av grunnane til å hente inn ein fotballpensjonist. Tidlegare landslagsspelar Kjetil Wæhler har blitt hanka inn saman med tidlegare Sogndal-spelar Espen Næss Lund.
– Vi er ekstremt glade for å ha fått inn desse to spelartypane i den situasjonen vi er i no. Eg har ei god magekjensle på dette, seier Flo.
Han fortel at problema tårna seg opp etter Haugesund-kampen, der Bjørn Inge Utvik fekk brotskade i ankelen, og Ulrik Fredriksen gjorde hands og vart utvist. Han er dermed er uaktuell i kampen mot Viking til helga.
– Etter den kampen kasta vi oss rundt og tok kontakt med dei to som no er her i Sogndal, seier Flo.
Håpar å rekke kampen på laurdag
Kjetil Wæhler er ivrig og kjenner seg klar for å spele fotball.
– Det har gått litt unna her. Eg kom til Sogndal i går og var på mi første trening i dag. Kroppen kjennest bra ut, og eg håpar å rekke tippekampen i helga, seier han.
Wæhler seier at han har halde seg bra i form, men at han kanskje er litt ute av trening når det gjeld det å spele fotball på ei stor bane.
– Eg har jo mykje rutine, så eg trur det skal gå rimeleg kjapt å kome inn i det igjen, seier den tidlegare landslagsspelaren.
Trur laget kjem til å rykke ned
Trenar og fotballkommentator Tom Nordlie trur kanskje ikkje dagens signering er rednigna for Sogndal.
– Det eg tenkjer om denne signeringa er at no er det krise i Sogndal, seier han.
Ekspertkommentator Karl-Petter Løken trur det blir vanskeleg for Sogndal å berge plassen i eliteserien denne sesongen.
– Eg var ein av dei som tippa Sogndal på ein av dei tre nedste plassane før sesongen. Det ser ikkje akkurat lysare ut no. Dei vil nok få det tøft. Men om dei skulle rykke ned, er ikkje det noka krise heller, seier Løken.