– Fanggjerdet må opp så raskt som råd

Det seier byggherre Rune Dvergsdal i Statens vegvesen etter at det fredag kom ned meir stein frå fjellsida ved Finnsåstunnelen .

For vel to veker sidan kom det ned eit stor ras som stengde vegen i over ei veke.

• Sjå: Oppdaterte vegmeldingar frå Statens vegvesen (ekstern lenkje)

– Det kan sjå ut som om steinane kom ovanfrå det førre raspunktet. Terrenget har endra seg så pass mykje at det er ikkje noko som tek imot det som kjem ned. Tidlegare stod det tre der, men dei forsvann i det større raset, seier Dvergsdal.

Skal spyle rasløpet

Raset fredag vart raskt rydda, men melding om mykje nedbør, kraftig vind og fare for nye fleire ras gjorde at vegen var stengd det meste av helga .

• Sjå: Oppdaterte vêrmeldingar hos yr.no

I dag tek ein spylebil til med spyling av nedste delen av raset. Tysdag skal eit helikopter spyle i fjellsida. Framleis blir vegen periodevis stengd, med tre opningstider på dagtid og gjennom natta.

Alternativ veg inn og ut av kommunen er fjellvegen til Tyin og E16 Filefjell.

– Det vil nok gå nokre dagar til før ein er ferdige med å rydde, men det avheng av vêret. I helga stengde vi grunna mykje nedbør. Det hadde vore mest gunstig med litt kulde, seier Dvergsdal.

70–100 meter gjerde

Etter første raset vart det bestemt å setje opp eit 70–100 meter langt fanggjerdet. Leveringstida er normalt på kring seks veker, men Dvergsdal seier dei håpar å få gjerdet levert i dag.

– No må ein få reinska på oppsida av raset, og så få opp fanggjerdet så raskt som råd. Det står litt rydding att før vi kan byrje arbeidet under raspunktet, seier Dvergsdal.

– Er det fare for at det kan komme ned meir?

– Det er vanskeleg å seie. Det er berre berg der, men eg trur vi kan kjenne oss nokolunde trygge.

– Det sa de sist også?

– Ja, men det er eit veldig vanskeleg område. Skal vi stenge heilt, så hadde det ikkje blitt noko god situasjon for Årdal.