– Då Eirik Bakke ringde meg i går og fortalde det, sa eg at det er det største sjokket eg har opplevd i mitt liv. Han var den beste kameraten eg nokon gong har hatt, og han var som ein bror for meg, seier Rolf Navarsete.
Beskjeden om Svein Bakkes bortgang kom onsdag ettermiddag. Han vart 62 år gammal.
- Les også:
– Han har betydd alt
Saman har Bakke og Navarsete stått bak oppbygginga av Sogndal, til ein klubb i toppen av norsk fotball dei siste 40 åra.
– Utan kvalitetane til fotballspelaren Svein Bakke hadde Sogndal aldri vore der dei er i dag, fortel Navarsete.
– Han har betydd alt for fotballen i Sogndal, legg han til.
Navarsete trekker fram ein sein og våt oktoberkveld i 2000, som eit av sine beste minne saman med Svein Bakke. Etter 1–1 heime og 2–2 borte sikra Sogndal seg opprykket til eliteserien, på kostnad av Vålerenga.
Bakke vert hugsa som ein snill og lojal mann, med eit ekstremt vinnarinstinkt. Avtroppande fotballpresident og tidlegare Sogndal-leiar Yngve Hallèn minnest ein mann som viste med døme korleis ein byggjer gode verdiar.
– Dei eldste vil hugsa han som ein spelar med ein slepen fot og eit ekstremt vinnarinstinkt. Då han etter 1998 sesongen sa at det er no oppturen byrjar, var det berre han og nokre få andre som trudde på det, seier Yngve Hallèn.
Glad han fekk oppleva opprykket
Denne sesongen har sonen til Svein Bakke, Eirik Bakke, tatt Sogndal tilbake til øvste nivå i norsk fotball på første forsøk.
– Eg er utruleg glad for at Svein fekk oppleva at Eirik tok Sogndal tilbake til Eliteserien. Svein var ikkje av typen som viste kjensler, men vi som kjente han godt veit at det betydde enormt mykje for han, seier Navarsete.
Svein Bakke spelte for Sogndal i perioden 1971 til 1990, og var mellom anna sentral då Sogndal kom til cupfinalen mot Brann i 1976. I løpet av sine 19 år som spelar noterte han seg med 321 mål på 514 kampar.
- Les også:
Han var også med på Sogndal-laget som tapte 2–1 i cupfinalen mot Brann i 1976.
På sosiale media har fleire uttrykt si sorg.