70 cm tjukk is på Gaula

- Eg har aldri sett så lite vatn nokonsinne, seier Terje Vallestad.

Stålis

Han gjekk ned til elva for å få tak i vatn til heimen, men kom ikkje særleg langt.

- Det er 70 centimeter med tjukk is i sjølve elveløpet. Det er heilt utruleg, seier han.

Han har, saman med to andre, ein brønn dei får vatnet sitt frå. Men den har vore tom i fire dagar, og dermed ville dei prøve å få pumpa vatn frå elva og opp i brønnen.

Ligg tjukk i elveløpet

- Men vi saga i to omgangar med motorsag, og måtte deretter slå oss gjennom resten av isen. Så tjukk er han. Og det er i elveløpet, seier Vallestad.

Han seier det ikkje var mykje vatn å hente under den tjukke isen heller.

- På det djupaste er det vel mellom ti og femten centimeter med vatn. Og det er ikkje særleg mykje.

Tina snø på vedomnen

I dei dagane familien har vore utan vatn, og dei henta vatn hjå bror til Vallestad.

- Vi har jo måtte gjere det på gamlemåten. Og vi får ikkje vaska klede eller vaska opp noko særleg. Vi har også tina snø i kjele på vedomnen inne slik at vi skulle ha til det mest naudsynte, seier han.

Vallestad seier vassmangelen snart vert eit kjempeproblem.

Uroa for vassmangelen

- Vi klarte å få vatn i brønnen, men det er jo andre som slit. Dei som har gardsbruk treng mykje vatn til dyra sine.

Han er også uroa for yngelen i elva.

- Når det er så kaldt at isen ligg tjukk og det nesten ikkje er vatn att i elva er det eit stort problem for yngelen. Eg trur det er mykje yngel som kjem til å ryke, seier han.