20 prosent fleire vel bygg og anleggsfag

– Vi synest fleire 10.-klassingar burde valt å ta yrkesfag etter ungdomsskulen, seier elevane Tina Haukeland Bruvik og Irmelin Oppedal Marøy som har valt å gå «Bygg og anlegg» på vidaregåande.

Etter fleire års nedgang, har 20 prosent fleire enn i fjor søkt bygg og anleggsfag til hausten. Dette gjer faget til den store vinnaren når det gjeld søkjarar til vidaregåande opplæring i Hordaland.

• LES OG: Trosset mamma da hun valgte

Fleire burde valt yrkesfag

– Det er ei gledeleg utvikling, for det har vore ei nedgang i fleire år, seier avdelingsleiar Ståle Brattebø ved Arna Vidaregåande skule. Han brenn for faget sitt og kan glede seg over oppgangen.

Men han gir seg ikkje der, for Brattebø meiner at langt fleire burde gått yrkesfag.

– Søkjarar til yrkesfag burde ha vore langt høgare. Det å ha vore på golvet og tatt i ting, gjer at ein verkeleg får ei heilt annan innsikt, seier han.

Han håper no dei gode søkjartala kan vekke til live byggfaget i heile fylket.

– Distriktsskulane har tidlegare hatt ei nedgang i bygg og anlegg, der det har vore mørke tal lenge. At det no går den riktige vegen i heile fylket er veldig bra, seier avdelingsleiaren.

• LES OG: Dette bør du tenke på ved utdanningsvalg

Usikre på valet

Også i år har rett under halvparten av tiandeklassane søkt yrkesfag til hausten. Studiespesialiserande samlar rett over 50 prosent. Ei stabil fordeling.

– Eg trur så få vel yrkesfag fordi dei er usikre på kva dei skal velje. Det er ikkje til å stikke under ein stol at yrkesfag ikkje blir sett på som edelt nok. Det meiner eg er heilt feil, seier Brattebø.

Dårlege tider

Nedgangen har derimot råka "Teknikk og industriell produksjon" i år, som har mista 23 prosent av søknadsmassen. Denne har blitt sett på som inngangsbilletten til oljebransjen, og dårlege tider der får skulda for færre søkjarar.

Nedgangen uroar Brattebø.

– Det er kjempesynd og veldig uheldig. Det står ei næring som har behov for dei, seier han.

I morgon samlast alle rektorane ved dei vidaregåande skulane i fylket, og skal få nøyaktige søkjartal til sine skular og linjer.