Fredag melder kommunen om 125 nye koronasmitta i Bergen. Det er det høgaste talet registrerte smitta på eitt døgn sidan pandemien starta.
Dei smitta er i alderen 2 til 84 år. Åtte av dei nye smitta er over 60 år.
Så langt har 12 personar ukjent smitteveg og to tilfelle er importsmitte, ifølge kommunen.
11 bebuarar på sjukeheimane i Bergen smitta.
Totalt 3123 personar har fått påvist koronavirus i Bergen. 2506 av desse er registrert sidan 7. august.
Byrådsleiar Roger Valhammer seier smittetala viser behovet for strenge tiltak.
– Vi forventar å kunne sjå ein effekt av lokale tiltak i byrjinga av neste veke, seier byrådsleiaren.
Opna ny teststasjon
Fredag opna ein ny testasjon på Festplassen for gåande og syklande.
Stasjonen midt i Bergen sentrum er i utgangspunktet ein drop in-stasjon, og skal halda open kvar dag heile veka.
– Eg er utruleg stolt og nesten rørt over den innsatsen som så mange menneske har gjort for at me kan opna i dag, sa helsebyråd Beate Husa (KrF) under den offisielle opninga av teststasjonen fredag føremiddag.
Skal minna innbyggarane om pandemien
Mange stader i landet er årets julemarknader avlyst på grunn av smittefaren.
I eit normalår skulle julemarknaden i Bergen blitt arrangert på Festplassen. I 2018 var 800.000 personar innom marknaden. I år var det venta opp mot éin million besøkande.
Men allereie i fellesferien avlyste arrangøren førsjulstradisjonen.
I byrådssaka i slutten av september var Festplassen trekt fram som det beste alternativet for ein ny sentrumsnær teststasjon for gåande og syklande.
I tillegg til å vera ein sentral og tilgjengeleg lokasjon alle i Bergen kjenner, vil plasseringa fungera som ei påminning til innbyggarane om pandemisituasjonen. (Det)«kan derfor vere ei svært positiv sideeffekt ved lokasjonen», heiter det i byrådssaka.
– Me har drøymt om teststasjon på Festplassen lenge. Det er lenge sidan legevaktsjefen sa ho ønskte seg ein testplass her, sa Husa under opninga.
Når for første gong testkravet
I starten har den sentrale teststasjonen ein kapasitet på 400 testar per dag. Etter kvart vil kapasiteten auka til 700 testar per dag – altså 21.000 i månaden.
Helsedirektoratet har eit krav om at kommunar skal kunna testa minst 5 prosent av innbyggarane i løpet av ei veke.
Når stasjonen opnar, og etter kvart aukar testkapasitet, er Bergen kommune oppe i 5,4 prosent.
Nato-hall
Legevaktsjef Dagrun Linchausen anslår at Bergen kommune har sett i verk rundt 100 årsverk som gjennomfører testing.
– Dei siste to vekene er det trent opp om lag 50 nye tilsette til å ta testar, opplyser legevaktsjefen.
Helseetaten har lagt opp til at ingen skal opphalda seg inne i teltet lenger enn 14 minutt. Torsdag gjennomførte kommunen ein vellukka stresstest for å sjå om alt fungerte som det skulle.
Stasjonen er ein isolert og oppvarma rubbhall for vinterforhold. Telthallen kommunen har leigd blei i fjor brukt under den store Nato-øvinga.