- Du skal ikkje sjå vekk frå at det blir ei kvit jul, seier Skildheim, og det er langt frå nokon sikker vèrprofet som spår årets vintervèr i dagens Bergens Tidende.
- Heile atmosfæren er i opprør, så det er litt vanskeleg. Gamle merkedagar tyder på at det blir kvit jul. Vi hadde det kaldt natt til 14. oktober, kaldt i aust, og det er teikn på at vi får ein kaldare vinter. Men det er så mykje som slår inn i våre tider. Ingenting er sikkert, konstaterer Magnus Skildheim i eit intervju med morgonsendinga til NRK Sogn og Fjordane.
- Ras og elendigheit
Pensjonisten frå Vadheim i Høyanger har spådd vèret i mange år, men denne gongen er han meir usikker enn nokon gong.
- Månefasane har vore nokså usikre teikn i sommar, og slik ser det ut til å halde fram. Jula kan bli kvit, men i så fall blir det ikkje langvarig. Vi har nymåne både først og sist i desember.
- Gå høgt nok, så finn du skiføret i år også, trur Magnus Skildheim. Arkiv-foto: Heidi Lise Bakke.
Skildheim trur vi får ein vanleg vestlandsvinter med snøfall som stadig blir avløyste av mildver.
- Det kan bli mykje ras og elendigheit, fryktar han.
Tipset til dei som vil nytte vinteren til å gå på ski er følgjande:
- Går du høgt nok, så er det nok snø der.
