Vil ha turistskatt i Kragerø – meiner det hastar å få på plass ei ordning

Kragerø kommune må snu på kvar krone etter at kommunen hamna på Robek-lista, som registrerer kommunar i økonomisk ubalanse.

Innbyggartalet i kommunen blir femdobla når om lag 50.000 turistar besøker kystperla kvar sommar.

Når sommarbyen skal gjerast fin og kommunen skal tilby turistane gode tenester, får det også økonomiske konsekvensar.

– Kragerø er i ein økonomisk skvis på grunn av mange turistar og hyttefolk, seier Tobias Drevland Lund.

Stortingsrepresentanten frå Raudt meiner at det må komme ein turistskatt, slik at turistane ikkje blir ei belastning.

Regjeringa har allereie fått kritikk frå både Nordland og Møre og Romsdal fordi dei meiner at arbeidet med turistskatten tek for lang tid:

Søppel må fjernast

Drevland Lund viser oss noko av det Kragerø-samfunnet betaler for, og som kostar ekstra mykje når turistane rykker inn i byen.

– Legevakta og helsevesenet må dimensjonerast for ein heilt anna befolkning om sommaren, enn elles i året. Turistar har også krav på handtering av søppel, vedlikehald av offentleg veg.

– Dette treng kommunen hjelp til å finansiere og turistane bør bidra meir, meiner Drevland Lund.

Han er skuffa over at regjeringa ikkje har fått i gang ei forsøksordning med turistskatt.

Allereie i januar i år varsla regjeringa at dei ønskte at turistane skulle bidra til spleiselaget:

Usemje blant lokalpolitikarane

Ordførar i Kragerø og partifelle Charlotte Therkelsen seier at ein eventuell turistskatt må behandlast politisk i Kragerø.

Ho vil heilt klart støtte ei slik ordning.

– Slik eg ser det, ville det vore eit kjærkomme tilskot til inntektene våre.

Turistane genererer mykje aktivitet som næringslivet i kommunen nyt godt av, forklarer Therkelsen.

– Men det er ei totalbelastning på tenester og infrastruktur som gjer at det blir høgare utgifter.

– Ønsker du at Kragerø skal bli blant dei første i landet til å prøve ut turistskatt, slik situasjonen er nå?

– Ja, det hadde vore fint å vere med på.

Blant dei politiske partia er det derimot ulike meiningar.

Varaordførar Jonas Nilsen blei vald inn frå Høgre, men sit nå som uavhengig representant. Han er ikkje like positiv.

– Eg ville stemt nei til turistskatt. Så der er vi ueinige.

Små marginar

I forslaget frå regjeringa blei hotell og overnattingsstader nemnde som aktuelle for ei ekstra avgift, i tillegg til parkering og cruise.

NHO-direktør i Vestfold og Telemark, Kristin Saga, ønsker ikkje ei slik avgift velkommen.

– Eg forstår innspelet i forhold til rettferd og at Kragerø er ein veldig pressa kommune sommarstid. Men det vi meiner er feil er å legge denne skatten på ei næring som allereie har eit stort skattetrykk og som har ganske små marginar.

Vil finne gode løysingar

Statssekretær i Nærings- og fiskeridepartementet, Tore O. Sandvik (Ap), seier at regjeringa prioriterer dette arbeidet.

Dei tar sikte på å sende eit lovforslag på høyring til hausten.

– Besøksbidrag er noko nytt i norsk samanheng, og vi må derfor finne gode løysingar som står seg over tid. Vi er godt i gang med å gjennomføre eit lovarbeid som skal gi kommunane høve til å innføre besøksbidrag, seier Sandvik.