Utryddingstrua korall funne langs kysten

Hopp til innhold

– Eg tenkte fyrst at eg kanskje hadde fått ei støvel på kroken slik som Donald Duck pleier å få, smiler Tom Erik Økland.

Han stod å fiska ved sundet Dypingen i Langesund da han plutseleg fekk napp på kroken. Det han fyrst trudde var ein støvel synte seg å vere ein bit korall.

– Pulsen byrja å slå litt fortare når eg skjønte kva eg hadde i hendene, seier Økland.

Den døde korallbiten var av typen Lophelia. Ein art som står på raudlista til Artsdatabanken, med status som "Nær truga" (NT).

– Sidan denne biten er ganske stor tyder det på at det har vore ein levande koloni her i området på eit tidspunkt. Kanskje er det noko her framleis, seier Økland.

Vil sjekke området

Kaldvasskorallen finst langs store deler av norskekysten, men mellom Hvaler i Østfold og Ryfylke i Rogaland er det ingen andre kjente bestandar. Korallen bryr seg ikkje om skipstrafikk og liker seg best på mellom 50- og 100 meters djup.

– Denne korallbiten har nok liggje død ei stund, men denne var ganske fin og kvit i toppane, så det kan tyde på at det finst meir, seier havforskar Jan Helge Fosså.

Han meiner dette er eit spennande funn fordi det manglar opplysningar om arten langs heile kysten av Sør-Noreg. Han får støtte frå staten, som ikkje ser bort frå at ein no må sjå nærare på desse havområda.

– Dette funnet tyder på at det finst meir korallar langs kysten enn me veit om. Me meiner difor ein burde setje i gang meir systematiske undersøkingar, seier Trond Eirik Silsand, som er seniorrådgjevar ved miljøvernavdelinga hos Fylkesmannen i Telemark.

Kven som eventuelt skal starte med undersøkingane er Silsand førebels usikker på, men han trur det for kan verte Havforskingsinstituttet som vil få oppgåva.

Om det skulle syne seg å vere korallar ute i fjordane her, bør området da vernast?

– Det er nok for tidleg å seie noko om enno. Fyrst må me skaffe oss meir kunnskap om områda her, seier Silsand.

Nasjonal raudliste for truga artar

Norsk raudliste for artar 2021 er den fjerde raudlista Artsdatabanken utgir.

Av over 46.000 observerte artar i Noreg per 2021, er 23.405 artar vurdert for Raudlista 2021.

Rangering av kategoriane (engelsk forkorting i parentes):

UTRYDDA:

Utrydda – Arten eksisterer ikkje lenger.
Utrydda i vill tilstand – Artar som er antatt å vere utrydda i vill tilstand, men som framleis overlever i fangenskap.

RAUDLISTA:

Regionalt utdøydd (RE) – Det er svært liten tvil om at arten er utdøydd frå ein region (her: Noreg).
Kritisk truga (CR) – Artar som er direkte truga og som har 50 % risiko for å døy ut frå 10 til 100 år fram i tid.
Sterkt truga (EN) – Artar som har høg risiko for å døy ut, nærmare bestemt 20 % risiko for å døy ut frå 20 til 100 år fram i tid.
Sårbar (VU) – Artar som er truga og har 10 % risiko for å døy ut innan 100 år.
Nær truga (NT) – Artar som på grunn av tilbakegang krev spesielle omsyn og tiltak. I Noreg har desse artane 5 % sjanse for å døy ut innan 100 år.
Data utilstrekkeleg (DD) – Artar som manglar nødvendig informasjon til å vurdere trusselbiletet, og kan vere alt frå kritisk truga til livskraftig. Som oftast er dette artar som likevel ville hamna på raudlista viss kunnskapen om dei var tilstrekkeleg.

IKKJE RAUDLISTA:

Livskraftig (LC) – Artar som ikkje er direkte truga.
Ikkje eigna (NA) – Artar som ikkje skal bli vurdert på nasjonalt nivå, i hovudsak framande artar (innført til Noreg etter år 1800), eller tilfeldige gjester.
Ikkje vurdert (NE) – Arten har av ukjende årsaker ikkje blitt evaluert, for eksempel fordi arten er relativt ny og difor manglar godkjenning som eigen art av Den internasjonale naturvernunionen (IUCN), eller fordi den har vore utdøydd så lenge at den ikkje er interessant å kategorisere.

Sjå meir om kategoriane og metoden i Artsdatabanken her.

Artsdatabanken har også ei tilsvarande raudliste for naturtypar.

Kjelde: Artsdatabanken, Sabima og Wikipedia.