Tidleg vinter fleire stader – skisenter opnar bakkane og sel meir

Skiglade nordmenn ventar spent på vintersesongen i år.

Korleis blir forholda? Kor mykje snø kjem det?

Fnugg.no har oversikta over forholda ved 130 alpinanlegg i heile landet.

Der står det at både Sjusjøen skisenter, Aurdal – Valdres alpinsenter og Høgevarde fjellpark i Flå opnar denne helga.

Neste helg står Gausta skisenter i Telemark, Hafjell alpinsenter, Myrkdalen fjellheisar i Voss, Trysil og Ål skisenter for tur.

– Vi har hatt ein veldig gledeleg start. Førre helg var det tre–fire anlegg som opna med fulle vinterforhold, seier Camilla Sylling Clausen.

Ho er generalsekretær i bransjeforeininga Norske alpinanlegg og fjelldestinasjonar.

Opna fleire veker tidlegare enn i fjor

Kvitfjell alpinanlegg, Skagahøgdi, Nesfjellet alpin og Bjorli skisenter var først ut med å opne bakkane førre helg.

Kvitfjell opna tre veker tidlegare enn i fjor.

– God kombinasjon av kuldeperiode saman med natursnø gav optimale forhold for opning, seier kommunikasjonsansvarleg i Alpinco, Veslemøy Eineteig Wedum.

I skrivande stund har Alpinco, som driv anlegga på Hafjell og Kvitfjell, selt 7 prosent fleire hei- og sesongkort enn året før.

– Spesielt mot utanlandsmarknaden. Dette har nok mykje av forklaringa si i kronekursen, men det er nok også ein viktig bidragsytar at folk reknar og veit at vi er snøsikre.

– Spente

Rauland skisenter i Vinje er eitt av dei største i Telemark og landet elles.

I den populære hyttekommunen planlegg dei opning 25. november. Også der har dei ein auke i førehandssalet frå i fjor.

Veke 7, som er den danske vinterferien, er heilt fullbooka på hytteutleige.

– Vi er veldig optimistiske, seier dagleg leiar Kristin Larsen.

– Mange har dårlegare råd. Korleis trur de det vil påverke besøket hos dykk?

– Det er klart at vi er spente på det. Men ut frå førehandssalet så verkar det som at mange har tenkt å vere mykje heime eller på hytta, og bruke næraktivitetane.

Trur på fulle fjellheimar

Førre vinter vart det meldt om rekordbesøk ved fleire norske skisenter.

Knallvêr i januar og februar, og mykje snø, fekk skiglade menneske ut i bakkane.

Camilla Sylling Clausen i Norske alpinanlegg og fjelldestinasjonar trur ikkje dyrtida vil øydeleggje for besøket denne sesongen.

Snarare tvert imot.

– Det har vorte dyrt å dra til utlandet, så det kan tenkjast at folk heller prioriterer å vere mykje på hytta. Eller dei kjøper sesongkort i næranlegget som gir mange månaders skiglede.

– Men det er framleis dyrt for mange å kjøpe dagskort eller sesongkort i eit alpinanlegg? Blir justert prisane noko i år?

– Det er klart at det er ei stor investering om ein heil familie skal kjøpe sesongkort i nokre av dei største anlegga i Noreg, men der får ein også kanskje mest for pengane om ein ser på føreseielegheit, lengde på sesong, breidde i tilbodet med bakkar, heisar og tilrettelagde aktivitetar.

Generalsekretæren påpeikar at det finst over 200 alpinanlegg i Noreg i alle storleikar og prisklassar.

Optimisme

På Gausta skisenter ved Gaustatoppen i Telemark veks dei seg stadig større.

Laurdag 17. november inviterar dei folket ut i bakkane.

– Det er tidleg i forhold til andre sesongar. Vi har solgt vesentleg meir på førehand i år enn vi har gjort før, så me har trua på at det blir ein bra sesong, sier driftssjef Bjørn Tverberg.