Mykje av det som blir stilt ut av folkedrakter og bunader er aldri vist på utstilling før. Utstillinga inne i dei gamle husa på Heddal Bygdetun er dela i tre.
Den eine delen viser folkedrakter slik dei såg ut på 1700- og 1800-talet, og det er både originale drakter og kopiar gjort i nyare tid.
Det er framifrå handverk og utsøkte detaljar som kan fjetre både unge og eldre. Ein treng ikkje vera oppvaksen i tradisjonsområda for å la seg fasinere.
Anne Bamble i fokus
Hovuddelen av utstillinga viser bunader inspirerte av Anne Bamle. Den siste står Ingrid Lene Langedok bak. Ho har latt seg inspirere av Bamle sitt arbeid, og vidareført og vidareutvikla Anne sin Aust-Telemark bunad.
Anne Bamle levde frå 1884 til 1972. Ho kom frå Heddal og har mykje av ære for det ein i dag kallar Aust-Telemarksbunaden.
På museet kan du no sjå mange gode døme på rikdomen innan folkedrakt- og bunadskulturen.
Nye krefter tar over
– Interessa for folkedrakter og bunader har kome etter kvart, seier Ingrid Lene Langedok.
Ho stiller ut mange av bunadene ho har laga i seinare år. Og det er ikkje berre godt vaksne kvinner som interesserer seg for bunader, stadig fleire unge kvinner vil vita og lære meir, hevdar ho.
– Sjå her er to prinsesse-bunader. Det var Anne Bamle som sette det namnet på dei. Eg veit ikkje kvifor, det berre er slik, seier Langedok.
Ho peikar på to rikt utsmykka stakkar med ei overflod av fargerike og nydelege broderi. Som bunadtilverkar legg ho stor vekt på å tilpasse bunadene til personen som skal ha dei.
– Sjå denne, den er laga til ei ung jente med store og vakre blå augo.
Ho viser til ein djupblå bunad laga til ei jente til konfirmasjon no i vår.
På høg tid
– Folkedraktene og bunaden er ein del av folkesjela i Heddal, seier museumsstyrar Helge Anderson.
Han meiner det var på høg tid at museet fekk ei ny Anne Bamle-utstilling, og han er godt nøgd med besøket.
– Takka vera godt vær i lange tider, har besøket vore godt i sommar. Det verkar som folk likar det dei ser.