Turistløyper, bygging av hytter og auka menneskeleg trafikk på Hardangervidda fører til at villreinen klumpar seg saman på eit for lite område. Då blir dei sårbare for sjukdomar.
Det er konklusjonen i rapporten Kjell Handeland har laga for Veterinærinstituttet.
– Det er uheldig at eit nomadisk flokkdyr blir pressa saman på små areal, seier veterinæren.
Kan ha tatt livet av tusen dyr
Beiting i eit for lite område fører til auka smitte av parasittar som hudbrems, svelgbrems og hjernemark.
Ifølgje rapporten har kalvane på Hardangervidda svært låg vekt, samanlikna med kalvar i andre villreinområde.
Handeland seier GPS-målingar viser at villreinen held seg i eit forholdsvis lite område.
– Der står dei meir eller mindre heile sommaren, og gjennomfører ikkje det tidlegare vårtrekket mot nord og vest.
– Får dei fotròte på meir enn eit bein, vil dei døy raskt, fordi dei ikkje klarar flytte seg rundt i terrenget.
Må få bruke eit større område
På 1800-talet og starten av 1900-talet gav fotròte store tap for reineigarane i Finnmark.
Årsaka var at det på den tida var vanleg å samle reinsdyra for å mjølke simlene. Dei stod tett og smitta gjekk lett.
Då dei slutta med det, og lét reinen fordele seg i terrenget, forsvann problemet.
For å redusere sjukdomar og bevare stammen på Hardangervidda må dei få bruke eit større område, meiner han.
– Vi må vege omsynet til dyrehelsa opp mot kor fritt menneske skal få lov til å opptre i fjellet.
– Til dømes vil hyttebygging i randsona høgst sannsynleg føre til auka ferdsel inn i villreinområdet.
Handeland peikar på at Noreg er forplikta, etter Bernkonvensjonen, til å ta vare på villreinen i den norske fjellheimen.
Desse stammene representerer dei siste restane av opphavleg vill tundrarein i Europa.