Revisjonen har avdekka ei rad med brot på lover og reglar i samband med gjennomgang av årsrekneskapet for 2002.
Vinje kommune har brote lover og reglar.
Blant anna er skattetrekk og fleire millionpostar bokført på feil konti.
Hovudrevisor Hildegunn Rui ved Vest-Telemark Kommunerevisjon seier merknadene gjeld alvorlege forhold, og at det er gjort feil som ikkje kan passere.
I revisjonsmeldinga for Vinje er det lista opp 11 forskjellige strekpunkt som handlar om "atterhald" og "presiseringar".
Rui seier dette er faguttrykk som viser til alvorlege brot på lover og reglar for god rekneskapsføring.
Også kontrollutvalet i Vinje er sterkt kritiske, og krev at administrasjonen må skaffe seg betre kunnskapar om budsjett- og rekneskapsføring.
Viser til hardt arbeidspress
For Plan- og økonomisjef Jan Myrekrok kjem ikkje kritikken heilt uventa.
- 2002 var eit litt tyngre år for økonomiseksjonen, så dette var ikkje heilt uventa, seier han.
Vidare i revisjonsmerknadene les vi at fleire bokførte konti ikkje er i samsvar med inneståande beløp.
Fleire millionbeløp er feil bokført, og som ikkje det var nok - i 2002 måtte Vinje kommune betale 106.000 kroner i unødvendige strafferenter fordi rekningar ikkje blei betalt innan forfallsdatoen.
Myrekrok seier 2002 var eit unntaksår prega av store omorganiseringar og innføring av nye rutiner.
Alt i år reknar han med å få meir sving på reknekapsføringa.
- Vi er meir ajour i år, og får ikkje noko gjentaking, seier han.
Årsmeldinga blir lagt fram på møte i Vinje formannsskap torsdag 12/6, og for kommunestyret 19/6.
