Kommunen ser seg nøydd til å plombere gammal brannstasjon

I helga brann det på nytt i den gamle brannstasjonen i Horten. Det var andre gong på to dagar, og fjerde gong i år.

Politiet mistenkjer at brannane er påtent.

Har tetta staden 15–20 gonger

Kommunen har prøvd å stengje bygningen før, men utan hell. No skal jobben gjerast grundigare enn nokon gong tidlegare.

– Vi skrur igjen alle moglege opningar og alle kjellarhol det er mogleg å krype inn, seier kommunalsjef i Horten, Geir Kjellsen.

Kommunen har tetta igjen hol i bygningen 15–20 gonger tidlegare. No blir også alt som kan knusast tetta .

Driftsleiar i Horten kommune, Hans-Petter Brusevold, handterer plomberingsjobben.

Han innrømmer at det vil vere mogleg å ta bort igjen alt dei set opp. Likevel håpar han tiltaka vil hjelpe.

– No er snart alt innvendig brunne opp. Vi håpar det er mindre interessant etter kvart.

Driftssjefen anslår at kommunen bruker 100.000 kroner på dagens jobb.

– No trykkjer vi litt ekstra til, seier Brusevold.

Vil avhøyre ungdommar

Vitne observerte 10–12 ungdommar løpande frå staden etter at det byrja å brenne fredag kveld.

Laurdag gjekk politiet ut og bad ungdommane melde seg. Så langt har ingen av ungdommane gitt lyd frå seg.

Politiet trur ungdommane er rundt 16–18 år gamle. No jobbar politiet med å identifisere dei, slik at dei kan avhøyrast.

Krimsjef i Horten, Jan Frode Johannesen, meiner folk i Horten ikkje har grunn til å vere bekymra for brann.

– Det er ingen grunn til å tru at folk bør frykte at det skal tennast på nokon andre stader og der folk bur, seier han.

Rasfare

Politiet har ikkje video av sjølve hendinga.

Det er ikkje videoovervaking av bygget eller i nærleiken. Politiet har innhenta video frå eit stykke unna.

– Kor alvorleg er hendinga?

– Dette er skadeverk ved brann. Det er ingen som bur i bygningen. Det hadde vore meir alvorleg med eit bustadhus, til dømes, seier Johannesen.

Politiet er i dialog med kommunen om sikring av bygningen.

Johannesen påpeikar at det mellom anna er rasfare med nedfall frå taket.

– Det er uheldig viss folk tek seg inn der og blir skadd. Eller at nokon prøver å fyre opp igjen.