Lars har vore på det høgaste fjellet i 83 land

Han kikkar ut av vinduet på ein regntung julidag. Det har ikkje blitt den årlege turen til eit nytt land og ein ny topp, det sørga koronaviruset for.

– Eg hadde tenkt meg ein tur til Georgia for å gå nokre fjell, men det er vanskeleg nå, seier Lars Holme.

I fjor fekk han med seg fire nye toppar, då han klatra fjella i Benin, Togo, Ghana og Mongolia.

I år ser det vanskelegare ut.

– Det er stussleg å reise når det er så mykje restriksjonar og usikkerheit, så akkurat nå kjenner eg at det er tryggast å vere heime.

Kom ei tåre på Europas siste topp

For det er ei imponerande liste med toppar eventyraren frå Horten har. Han byrja så smått i 2003 med eit mål å gå på den høgaste toppen i alle Vestfolds kommunar.

No har han samla med seg den høgaste toppen i alle kommunar opp til Nordland fylke og han har ei lang liste med såkalla nasjonstoppar. Det vil seie den høgaste toppen i eit land.

Han har vore på den høgaste toppen i alle Europas land og når han klatra opp på Hvannadalshnùkur på Island som Europas siste nasjonstopp, kom det ei tåre.

– Det var litt vemodig faktisk, så eg gjekk å sippa litt dei siste par kilometerane då, mimrar han seg tilbake.

Aukande trend

At nordmenn er glad i fjell er ikkje noko nytt. Dei siste åra har det vekst fram ulike forum der fjellvandrarar delar sine turrapportar med andre.

Lars Holme blei sjølv inspirert av andre sine reiseskildringar og er aktiv på ulike forum.

Eit forum som har merka auka interesse for å samle på toppar er sida "Peakbook".

– Me har hatt ein jamn stigning i brukarar dei seinare åra, fortel administrator for sida, Morten Helgesen.

Han seier dei merkar at aktiviteten er sesongbasert med stor trafikk i sommarmånadane. På forumet delar folk rapportar frå inn- og utland og ein kan samle toppar etter ulike lister.

– Me får tilbakemeldingar om at mange finn motivasjon til å kome seg ut, gjennom å samle etter lister.

To forsøk i Vatikanet

Nokre turar er lettare enn andre fysisk sett. Vatikanstaten sitt høgaste punkt ragar ikkje meir enn 75 meter over havet og er Europas lågaste nasjonstopp, men kan vere utfordrande på andre måtar.

– For å komme opp på Vatican Hill i Vatikanstaten må du bestille guiding i Vatikanhaven, det hadde eg ikkje gjort fyrste gongen. Eg måtte difor gjere vendereis, smiler Holme.

For toppen er alltid det viktigaste for Hortensmannen når han er på tur og innrømmer at turen ikkje er heilt den same om han ikkje kjem på toppen.

– Eg er såpass toppoman at målet er å kome på toppen. Om eg ikkje har kome på toppen er turen mislykka, sjølv om eg har hatt det fint elles, så barnsleg er eg.