Bonde fortviler etter at ku døydde: – Som å ete eit barberblad

På Tufte gard, som ligg i Våle i Tønsberg kommune, driv Harald Lie blant anna med mjølkeproduksjon.

I slutten av førre veke var bonden bortreist da ein avløysar ringde og fortalde at ei av kyrne på garden var døde.

Da Lie kom tilbake så han at den døde kua, som akkurat hadde fødd ein kalv, hadde blod i nasen og munnen.

Bonden er ikkje i tvil om kva som har skjedd med kua.

– Den hadde ete noko ho ikkje skulle.

Lie har sjekka overvakingsbilete frå fjøset og meiner kua har fått i seg bitar av ein aluminiumboks som har hamna i fôret.

Umogleg å finne alle

I løpet av nokre timar har kua rett og slett blødd i hel, forklarer Lie.

Bitar frå aluminiumboksar som er knuste av slåmaskiner kan vere veldig skarpe. For drøvtyggande kyr kan det ende med døden.

– Det er som å ete eit barberblad.

Lie fortel at han bruker mykje tid på å rydde boksar og anna søppel frå jorda sine, men at det er umogleg å finne alt.

Ber folk skjerpe seg

Bjørn Gimming, som er leiar i Noregs bondelag, seier at denne typen forsøpling er eit problem for bønder i heile landet.

Han veit ikkje kor mange kyr som døyr etter å ha fått i seg bitar frå aluminiumboksar, men trur omfanget har auka dei siste åra fordi det blir selt meir drikke på boks enn før.

Bondelagsleiaren trur merksemda rundt problemet er større enn tidlegare fordi fleire bønder har fortalt om konsekvensane det kan få når søppel hamnar på jorde.

Gimming seier det ikkje finst unnskyldningar for å kaste frå seg søppel utandørs i Noreg.

– Vi har gode ordningar for avfallshandtering og resirkulering.

– Håpar folk lærer

Harald Lie synest det er meiningslaust at dyr skal lide og døy fordi folk ikkje kastar søppel der han skal kastast.

Foreløpig er det ingen andre kyr på garden hans som har blitt dårlege, men bonden seier det har vore ubehageleg å ikkje vite om fleire av dyra kan ha fått i seg fôr med aluminiumrestar.

Lie trur auka pantesatsar kunne bidratt til at færre boksar hamna på jorda. I tillegg må folk ta innover seg kor alvorlege konsekvensane kan bli, meiner han.

– Eg håpar at folk lærer etter kvart, men det er framleis mange boksar å plukke.