Avlyst for første gong sidan 1866: Tapar ein halv milliard

Noregs største landbruksmesse har overlevd det meste på sine 153 år. Men tysdag bestemte arrangørane seg for å avlyse.

Årsaka er koronarestriksjonane.

– Det er uverkeleg, men sant, seier marknadssjef Yvonne Eilefstjønn.

Arrangementet har rundt 800 utstillarar som til saman omset for ein halv milliard kroner på messa kvart år.

– Umogleg med avstand

Regjeringa heldt fast ved at større arrangement kan medføre risiko for store smitteutbrudd.

Dyrsku'n seier det vil vere umogleg å halde oppe krav til ein meters avstand og smitteverntiltak for matservering. Dei meiner det vil vere uforsvarleg å arrangere.

– Vi håpa i det lengste på eit anna utfall, men det er klart at omsyn til liv og helse må gå først, seier dagleg leiar Geir Helge Espedalen.

– Store konsekvensar for samfunnet

Dyrskuplassen i Seljord samlar 200 000 menneske til ulike arrangement kvart år, mellom anna Countryfestivalen.

Ordførar Beate Marie Dahl Eide er bekymra for kva det vil ha å seie for lokalsamfunnet. No ber ho regjeringa om pengar til å sikre arbeidsplassar og frivillig sektor.

Dyrskuplassen har 17 fast tilsette og 2000 frivillige er i sving under arrangementa.

– Vi har mange heilårsarbeidsplassar knytte til aktivitetane på Dyrskuplassen, så konsekvensane for samfunnet vil bli store. Seljord blir særs hardt ramma, seier ho.

Etterlyser meir pengar

Dyrsku-sjefen håpar at betre kompensasjonsordningar vil komme på plass.

– Vi vil jobbe tett opp mot politikarar og departement for å dra dette vidare, seier han.

Tidlegare landbruksminister og no stortingsrepresentant for Frp, Bård Hoksrud, seier at han vil jobbe for å sikre vidare drift.

– Liv og helse må gå føre arrangement, uansett kor trist det er. Med nesten 100.000 besøkande veit eg at det er mange som er skuffa no, seier Hoksrud.

Landbruks- og matminister Olaug Bollestad (KrF) var ikkje tilgjengeleg for ein kommentar tysdag ettermiddag.