Kasta av eigaren – fleire tusen melder frå til Mattilsynet

Berre flaks gjorde at Fina og dei to ungane hennar blei funne i live, og levert til Redd Dyra Telemark.

Kjæledyreigarar kjem dårlegast ut i den ferske statistikken frå Mattilsynet som syner kor mange varselmeldingar det kjem på dårleg dyrevelferd.

– Eg er ikkje overraska. Vi får melding om kattar som er kasta i søpla, «attgløymde» i tomme hus, og kattungar som er køyrt av stad langt utanfor allfarveg og overlatne til seg sjølve, seier Nina Daapan i Redd Dyra Telemark.

– Kattar og dyr har ikkje noko slags vern, dei er heilt avhengige av sine eigarar.

• Les også: Flere tips etter mistanke om brutal henrettelse av unghund
• Les også: ”Kattemannen” tiltalt

Rundt 7000 meldingar til Mattilsynet

På landsbasis har det så langt i år kome inn rundt 7000 bekymringsmeldingar frå folk som varslar om dyr dei trur har det vondt fordi dei får for dårleg stell.

Distriktssjef Jan Egil Aronsen i Mattilsynet i Nedre Telemark seier at to tredelar av varsla som kjem inn til Mattilsynets gjeld kjæledyr. Berre ein tredel gjeld hobbyhest og andre husdyr.

– Det mest avgjerande når det gjeld dyrestell, er kompetanse. Dei som lever av å drive med dyr, tek også betre var på dyra, seier Aronsen.

Det er ikkje bøndene som er dei største syndarane, det er eigarar av kjæledyr som er mest i søkeljoset.

• Les også: Mener norske kjendiser promoterer dyremishandling
• Les også: - Fleire visste uten å varsle
• Les også: Familie i sjokk etter kanindrap

10.000 sidan starten

Distriktssjef Jan Egil Aronsen seier at trenden er lik over heile landet, kjæledyr ser ut til å vera dei som får dårlegast omsorg av sine eigarar.

– I alle fall er det dei me får flest meldingar om, seier Aronsen.

Kvar sjuande melding som Mattilsynet har registrert, kjem frå fylka Buskerud, Vestfold og Telemark. Årsaka kan vera at det er urbane strok der folk kanskje skaffar seg kjæledyr utan heilt å forstå ansvaret, fortel Aronsen.

Varslingstenesta til Mattilsynet blei etablert sommaren 2010, og sidan den gong har det kome rundt 10.000 varslingar.

Alle skuldar på alle

Hjå Redd Dyra Telemark vil både Mattilsynet, politiet, kommunane og enkeltpersonar gjerne levere inn kattar, men Nina Daapan seier at dette er friviljug arbeid, og dei må rett som det er sei nei for køen av folk som kjem med heimlause kattar er alt for lang.

– Mattilsynet skuldar på kommunane, og kommunane skuldar på Mattilsynet, men ingen tek ansvar seier Daapan i Redd Dyra.

Ho legg til at det er alt for lett å skaffe seg kjæledyr, og dessverre alt for lett å kvitte seg med dei utan at nokon sikrar at dyra blir humant behandla.