Senterparti-politikar Steinulf Tungesvik meiner språk har fått fornya politisk kraft.
– Det viser seg at spørsmålet er mobiliserande, seier den tidlegare mållagsleiaren og statssekretæren for Sp. Høgre og Frp har tydelege programformuleringar som vil endre nynorsken sin plass i skulen. Då det også kom forslag frå den raud-grøne Regjeringa i fjor om å endre på sidemålsundervisninga i skulen, reiste nynorskfolket seg, og til slutt vann dei fram. Det skal framleis vere både eksamen og eigen sidemålskarakter i norsk skule.
– Det er interessant. Når dette no er blitt eit tydelegare politisk spørsmål trur eg det kan påverke partivalet til folk, seier Tungesvik til NRK.
Får applaus
Det trur også Venstres Sveinung Rotevatn som er førstekandidat i Sogn og Fjordane. Han driv valkamp på språkspørsmålet og nemner gjerne kampen for nynorsken i skuledebattar.
– Då får ein faktisk applaus, iallfall i Sogn og Fjordane. Eg framhevar dette i valkampen min, seier Rotevatn, som også er engasjert i målrørsla.
Les også:
Lunkne
Men folk NRK møter i nynorsk-land på vår reise langs kystvegen E39 seier viktigare spørsmål avgjer partivalet.
– For meg er det det same.
– Språket utviklar seg slik det vil uansett.
– Vegbygging og slike ting avgjer for meg, er nokre av påstandane til NRK på eit kjøpesenter i Nordfjord.
– Det er nok ikkje så mange som vel parti ut frå målsaka åleine. Men mange står og vippar mellom ulike parti og då kan språkspørsmålet vere eitt av dei spørsmåla som vippar deg over til den eine eller andre sida, trur Rotevatn.
