Partileiarane har hatt den første offisielle samtalen seg i mellom etter valet. I første omgang var det berre sondering som stod på programmet, og eit pittelite, første steg mot å forme ei ny regjering er tatt.
Alle er ved godt mot, men det er enno langt igjen til noko er avklart.
– Vi har hatt eit sonderingsmøte. Det har skjedd i ein god tone, seier Erna Solberg, som seier ho har god tru på at alle dei fire borgarlege partia skal klare å forme regjering.
– Eg har alltid levd i den tru at vi skal få det til. No sit alle og snakkar og eg vil ikkje gi noko løypemelding på kor sterkt eller lite sterkt eg trur på det. Eg trur på det så lenge alle sit rundt bordet, seier ho.
SE PRESSEKONFERANSEN:
De borgelige holdt pressekonferanse
– Erna blir statsminister
For det er framleis uklart korleis dei fire partia skal utforme den nye regjeringa. Det er sett av minst ei veke til slike sonderingsavtalar, før dei fire parta deretter skal finne ut om det er grunnlag for forhandlingar.
I det minste sit dei rundt same bord, og ingen lagar dårleg stemning, ifølgje den påtroppande statsministeren.
– Det er ikkje kome nokre skjelsettande avklaringar i dag, men vi har bestemt oss for å fortsette å snakke i lag, held Solberg fram og legg til den største, store avgjerda dei fire leiarane har kome fram til:
– Vi er einige om kven som er statsministerkandidat. Dersom de ikkje visste det, så blir det meg, seier Erna Solberg.
– Ingen trur dette blir lett
Dei fire borgarlege leiarane møttest klokka 12.30 på Radisson Blu i Nydalen måndag, og møtte pressa til pressekonferanse etterpå.
– Det må kome mange avklaringar, men vi har lagt eit godt grunnlag, seier Krf-leiar Knut Arild Hareide.
– Ingen trur dette blir lett, legg Siv Jensen til.
Vedgår utfordringar
Venstre-leiar Trine Skei Grande kom heller ikkje med nokon «skjelsettande» avklaringar, men antyda at Venstre uansett vil bidra til eit skifte.
KRF-leiar Knut Arild Hareide, Høgre-leiar Erna Solberg, Venstre-leiar Trine Skei Grande og Frp-leiar Siv Jensen poserte fint for pressa framfor den første sonderingssamtalen om ei ny regjering.
– Vi har fått eit mandat av veljarane om å få til eit skifte. No sit vi her og prøvar å gjere det. Det er nok ei kjensle frå minutt til minutt om korleis den enkelte føler at det går, seier Grande.
Erna Solberg vedgår at det står utfordringar på menyen, trass i at det enno ikkje er nokon sure miner å sjå rundt samtalebordet.
– Stemninga er veldig god, men det er klart det er usemjer mellom desse partia. Vi er villige til å kome fram til kompromissar, seier Solberg til NRK.
Framleis lite sannsynleg med Venstre + Frp
Venstre-leiar Trine Skei Grande skulle ønske ho hadde større gjennomslagskraft i sonderingssamtalane.
– Eg skulle ønske vi hadde fått meir enn oppslutninga på 5.2 eller 5.3 prosent. DÅ kunne vi ha fått meir gjennomslag rundt bordet, men vi skal prøve å maksimere det mandatet veljarane har gitt oss, seier ho.
Grande held likevel fast på at det framleis er lite sannsynleg at dei vil gå i regjering med Framstegspartiet, men utelukkar det ikkje.
– Vi har sagt at det er lite sannsynleg, men det skal vi ikkje gjenta for mange gongar. No skal vi sjå kva slags gjennomslag vi kan få, det er det veljarane mine er opptekne av. Det veit eg, seier Skei Grande.
Denne veka kjem partileiarane til å finne ut om det er grunnlag for forhandlingar. Ifølgje Skei Grande kan dette ta lengre tid enn planlagt.
– Denne veka skal vi gå gjennom alle viktige tema for å sjå kvar vippepunkta mellom partia går. Så ser vi etterpå om det er grunnlag for forhandlingar, seier ho.
