Det har ikkje mangla på synsing om kva som er smertegrensene for dei ulike borgarlege partia i eit eventuelt regjeringssamarbeid med Erna Solberg og Høgre. Ikkje minst har Frp-nestor Carl I. Hagen skapt overskrifter med si ti-punkts kravliste.
- LES OGSÅ:
- LES OGSÅ:
Is i magen
No manar sentrale partiaktørar i Venstre og Framstegspartiet medlemmene om arbeidsro.
– Vi må ha is i magen og tiltru til at dei som skal forhandle gjer ein skikkeleg jobb, seier nyinnvalt stortingsrepresentant frå Hordaland og sentralstyremedlem i Frp, Helge André Njåstad.
Han får støtte frå Terje Breivik, nestleiar i Venstre og nyinnvalt representant frå Hordaland.
– No treng alle partia litt tid på kammerset, seier han til NRK.no.
- LES OGSÅ:
– Må ha tillit til forhandlarane
I Framstegspartiet har sentralstyremedlem Njåstad stor forståing for at mange partimedlemmer både er engasjerte og har sterke meiningar.
– Det er første gong vi er komne så langt at vi sit i sonderingar til ei mogleg regjering. Det er mykje kjensler i sving og mange som har innspel.
Men, seier Njåstad:
– Det er veldig viktig at dei organa som no skal forhandle får litt armslag, og at ein ikkje kjem med ultimatum internt i partiet i forkant og gjennom media. No må vi ha tillit til at dei som skal gjere jobben gjer den skikkeleg. Så er det partiet sine organ, for vår del landsstyret, som tek stilling til eit ja eller nei til ei regjeringsdeltaking.
- LES OGSÅ:
Framleis i valrus
Tysdag kveld deltok Njåstad og Breivik på kvar sitt sentralstyremøte i Oslo. Dei skildrar ei euforisk stemning i partia.
– Det var så god stemning at vi gløymde å ete kakene som stod bakarst i lokalet. Vi oppsummerte og fekk ei orientering om løpet vidare, fortel Njåstad.
Også på Venstre sitt hovudkontor var det feiring, ikkje krav til ei regjering, som stod på dagsordenen.
– Vi hadde behov for og stor glede av å oppsummere valet. For Venstre sin del så handlar det no om å vegen vidare for partiet som organisasjon, og så smått begynne å førebu dei viktige samtalane som skal skje på borgarleg side, seier Breivik.
I Venstre, som i siste stortingsperiode har vore marginalt små på tinget, er det ikkje berre ei mogleg regjering som står på arbeidsplanen. Partiet sin nestleiar er oppteken av at ein også treng ro til å omrømme seg, no som dei går frå berre to til sju stortingsrepresentantar. Det gjeld både spørsmålet om regjering, men også enkle kvardagsrutinar, komitéønske og andre praktiske spørsmål.
- LES OGSÅ:
- LES OGSÅ:
Fryktar utspel forsurar forhandlingane
– Vi skal ha samling for den nye stortingsgruppa for første gong onsdag. Det er ei samling der denne typen til vil bli drøfta. Eg skjønar veldig godt både media og publikum, men strengt tatt har vi veldig god tid i forhold til når ei eventuell ny regjeringsplattform må vedtakast, seier Breivik.
I Framstegspartiet håpar Njåstad at medlemene dei neste vekene tek drøftingane internt – ikkje i media.
– Vi skal først sondere, og seinare forhandle. Det er ein stor jobb som skal gjerast. Desto meir opne diskusjonar ein har frå partimedlemmer i det offentlege rom der folk stiller krav, desto vanskelegare blir det å gjere jobben, seier sentralstyremedlemmen frå Hordaland.