Zelenskyj: – Ekstremt akutt ved fronten i Donetsk

Ukrainske styresmakter seier ifølgje AFP at den russiske hæren dei siste dagane har intensivert angrepa rundt den vesle administrasjonsbyen Vuhledar i Donetsk.

Før krigen hadde byen ei befolkning på 15.000.

Ventar ny russisk offensiv

– Det er kraftige kampar der, seier den ukrainske militære talspersonen Sergij Tsjerevaty.

Ukrainske styresmakter reknar med at russarane prøver å bryte gjennom forsvarslinjene til ukrainarane, og at det vil komme ein større offensiv om kort tid.

– Det er ingen løyndom at dei førebur ei ny bølgje innan 24. februar, seier Oleksij Danilov som er sekretær i Ukrainas nasjonale tryggleik- og forsvarsråd.

Dette er eittårsdagen for då Russland sette i gang krigen mot Ukraina. Ukrainske styresmakter reknar med at russarane ønskjer å kunne vise til framgang på slagmarka til denne dagen.

Ukraina vil ha meir

Den ukrainske presidenten Volodymyr Zelenskyj seier at situasjonen ved fronten i Donetsk er «ekstremt akutt».

– Okkupantane stormar ikkje berre posisjonane våre. Dei øydelegg medvite og metodisk byane og landsbyane rundt dei, med artilleri, luftangrep, missil, sa Zelenskyj i ein videotale fredag kveld.

Han ber på nytt om meir militærhjelp etter at vestlege land har lova å sende 321 stridsvogner.

– Den russiske aggresjonen kan berre stansast med tilfredsstillande våpen, understrekar presidenten.

Noreg er blant landa som lovar å gi stridsvogner av typen Leopard 2.

Tidlegare har Noreg gitt sjølvdrivne kanonar av typen M 109 til Ukraina.

Såra i russisk angrep

NRK besøkte nyleg mannskapet på ein av desse kanonane.

I går vart denne kanonen angripe av ein russisk drone.

«Igor har vorte ein 300.»

Det skreiv den ukrainske journalisten og politikaren Serhii Lestsjenko til NRK fredag ettermiddag.

Talet 300 fortel at nok ein ukrainsk soldat er skadd i den blodige krigen i Donbas aust i Ukraina.

Det er i denne regionen dei hardaste kampane no går føre seg.

Norske kanonar

Igor var ein av dei som bemanna dei sjølvdrivne M109-kanonane som Noreg har gitt til Ukraina.

NRK møtte han og resten av mannsskapet på «den norske kanonen» sør for byen Kurakhove 13. januar.

Den gongen uttrykte Igor stor takksemd overfor Noreg, som gav vel 20 slike kanonar til Ukraina.

Serhii Lestsjenko skriv i ei melding til NRK at kanonen M109 vart angripen av ein russisk Lancet-drone.

Det var i dette angrepet Igor vart såra, ifølgje Lestsjenko. Han sende også bilete som viser den skadde soldaten.

Det er uklart kor alvorleg såra Igor er, men han er altså ein 300, som er nemninga for ein såra soldat.

200 er nemninga på ein drepen soldat.