IS kontrollerer ikkje lenger dammen, men hadde kontroll over han i ein periode frå august i 2014. Irakiske regjeringsstyrkar med flystøtte frå USA greidde å ta tilbake dammen eit par veker seinare, men den spente situasjonen i området har sidan resultert i mangelfullt vedlikehald.
Den islamske staten (IS)
Amerikanske styresmakter fryktar at anten manglande vedlikehald eller sabotasje frå IS, skal få den over 100 meter høge og 3,4 kilometer lange demningen til å bryte saman. Irakiske styresmakter har prøvd å tone ned faren, men USA ber likevel sine borgarar i landet om å førebu seg på eit katastrofe-scenario langs den viktige elva Tigris.
Ekspertar har rekna ut at om demninga blir sprengt, så vil Mosul by i løpet av eit par timar bli sett under 20 meter vatn. Byar som Tikrit, Samarra og Bagdad får mellom 24 og 72 timar på seg føre dei enorme vassmengdene kjem.
– Liten fare
– Vi har ingen spesifikke opplysningar som indikere når eit slikt dambrot kan skje, men det er viktig å understreke at ei rask evakuering vil vere den mest effektive måten å redde fleire hundre tusen liv på, heiter det i åtvaringa til amerikanske statsborgarar i Irak.
Iraks statsminister Haider al-Abadi sa i helga at risikoen for eit dambrot i den gedigne konstruksjonen er ekstremt liten.