Skulane der han er rektor ligg i Kandahar-regionen i Afghanistan, kor Taliban står sterkt.
– Me underviser i særs konservative område av landet der påverknaden frå Taliban er stor, så me må gjere det i skjul, fortel Ehsan som i kveld er gjest hos NRK Urix.
- SJÅ INTERVJU MED EHSAN I URIX PÅ NRK2 KLOKKA 22.30
Først religiøse bøker, deretter andre
Han fortel at bøker vert sendt til jentene sine heimar, og at ein først startar med religiøse bøker, men deretter lurer inn anna lektyre også.
- LES OGSÅ:
– Me sender inn bøker i skjul. Me startar først med religiøse bøker, men litt etter litt introduserer me andre bøker som mattebøker, språkbøker og andre skulebøker.
– Skjer undervisninga i jentene sine heimar?
– Ja, det gjer det, og i nokre tilfelle også i moskear, seier Ehsan.
Blussa opp ny kvinnekamp
I Afghanistan er kvinners rettar særs avgrensa, og mange jenter får aldri gå på skulen eller kome seg ut i arbeid.
Men dei siste dagane har det blussa opp ein kvinnekamp i landet, etter at ei kvinne vart lynsja og drepen fordi ho skulle hatt sett fyr på ein koran, noko som seinare har vist seg å vere feil. I fleire dagar har hundrevis av afghanarar protestert i gatene.
- LES OGSÅ:
Ehsan synest det er bra at drapet har vekka mykje merksemd, sjølv om det er trist at eit uskuldig liv har gått tapt.
– Aktiviteten på sosiale medium og andre stader i Afghanistan viser at folk er sinte. Og dette er eit godt døme på at folk har endra seg, og at dei no reagerer på vald mot kvinner, meiner Ehsan.
(Saka held fram under videoen)
– Tenk om dette skjedde utanfor Kabul
Tidlegare BBC-korrespondent i Afghanistan og noverande leiar av Afghanistan Analysts Network, Kate Clark, er ikkje like optimistisk.
– Etter kvart vart det reagert bra nok. Men i byrjinga var det to høgståande embetsmenn som rettferdiggjorde drapet. Dei nærast aksepterte at mordet fann stad. Tenk om dette hadde skjedd i ingenmannsland utanfor Kabul, då ville reaksjonen vore annleis trur eg, seier Clark.
- LES OGSÅ:
Ehsan held likevel fast på at Afghanistan er i endring, og det i positiv retning.
– Dette er eit godt døme for folk i framtida. Folk vil ikkje godta slik brutalitet mot kvinner, fordi me ser reaksjonen frå både menn og kvinner i Afghanistan no. Denne kvinna sette eit godt døme, sjølv om me mista eit uskuldig menneske, seier Ehsan.