Søndag hevdar underkommandør for dei ukrainske styrkane på Azovstal-stålverket at russiske styrkar held fram med angrepa mot stålverket.
– Vi held fram med å kjempa så lenge vi lever, seier kommandøren ifølgje Reuters.
Han seier i ein videosamtale at det er mange skadde soldatar, og at bønfell å få dei evakuerte.
Vidare seier han at dei ikkje kan bekrefta at alle sivile har blitt evakuerte.
Laurdag hevda ukrainske styresmakter at alle kvinner, barn og eldre sivile skulle vera evakuerte frå stålverksområdet Azovstal i Mariupol.
Ukrainas president Ukrainas president Volodymyr Zelenskyj sa at regjeringa no er over i ny fase, som handlar om å få dei ut dei ukrainske soldatane frå stålverket.
– Dette er ekstremt vanskeleg, men viktig, sa Zelenskyj i ein videotale natt til søndag.
Åtak på skule
Guvernøren i Luhansk, som også ligg aust i Ukraina, seier at Russland har bomba ein skulebygning der 90 menneske hadde gått i dekning.
– 60 menneske er drepne etter eit luftåtak på ein skule i Bilohorivka, skriv Serhij Hajdaj på Twitter.
Han er guvernør og leiar for den militære administrasjonen i Luhansk, som ligg aust i Ukraina.
90 personar hadde gått i dekning i kjellaren i skulebygningen, skriv Emine Dzheppar, første viseminister i utanriksdepartementet i Ukraina, på Twitter.
Har tatt opp att redningsarbeidet
Guvernør Hajdaj hevdar at berre 30 av personane som hadde søkt dekning blei redda ut i live.
Han har publisert ein video av eit bygg som ligg i ruinar og som brenn.
Åtaket skal ha skjedd laurdag kveld. Redningsarbeidet skal også ha starta laurdag, men blei avbrote natt til søndag. Arbeidet blei tatt opp att søndag morgon.
Opplysningane er ikkje stadfesta av uavhengige kjelder. Det russiske forsvarsdepartementet har ikkje svart på spørsmål om den påståtte bombinga, skriv Reuters.
Harde kampar i Luhansk
Ifølgje guvernøren hadde folk i landsbyen søkt dekning i skulen etter at ein annan bygning som blei brukt som tilfluktsrom blei øydelagt.
Skulen skal då ha vore einaste staden der folk kunne søkja dekning.
– Nesten heile landsbyen hadde søkt tilflukt, alle som ikkje var evakuerte, seier Hajdaj til CNN.
Han hevdar at det var eit russisk fly som slapp ei bombe på skulen.
Det føregår harde kampar i Luhansk, som er eitt av fylka som russikvenlege separatistar har hat delvis kontroll over sidan 2014.